નવી દિલ્હી, 25 ઓક્ટોબર (હિ.સ.). વિદેશ મંત્રી ડો. એસ. જયશંકરે રવિવારે કહ્યું છે કે, દુનિયા આજે બે મોટા સંઘર્ષો- યુક્રેન અને પશ્ચિમ એશિયામાં ફસાયેલી છે અને તેની સૌથી મોટી કિંમત તે સમાજો અને અર્થતંત્રો ચૂકવી રહ્યા છે જેમનો આ સંઘર્ષો સાથે કોઈ સંબંધ નથી. આવી સ્થિતિમાં આપણે લાચાર દર્શક બનીને રહી શકતા નથી. ભારત સંવાદ અને કૂટનીતિ પર ભાર મૂકીને ખરેખર વૈશ્વિક ભાવનાને વ્યક્ત કરે છે અને આ દિશામાં અન્ય ભાગીદારો સાથે કામ કરવા માટે તત્પર છે.

ચિન્મય અમૃત મહોત્સવ વૈશ્વિક સંમેલનને સંબોધિત કરતા જયશંકરે આજે કહ્યું કે,જટિલ સપ્લાય ચેઇન, વૈશ્વિક બજારો અને વહેંચાયેલા સંસાધનોના યુગમાં દુનિયા અડધી સમૃદ્ધ અને અડધી વંચિત રહીને પ્રગતિ કરી શકતી નથી. આ સતત અસ્થિરતા જાળવી રાખવાનું જ માધ્યમ છે.

મંત્રીએ પોતાના નિવેદનમાં આતંકવાદને શાંતિ માટે ઘાતક ખતરો ગણાવ્યો અને કહ્યું કે, કેટલાક દેશો આજે પણ રાજકીય ગણતરીઓને પ્રાથમિકતા આપે છે. તેમણે કહ્યું કે રાજ્યની નીતિના હથિયાર તરીકે તેનો ઉપયોગ અસ્વીકાર્ય છે. તેને ક્યારેય પણ યોગ્ય ઠેરવી શકાય નહીં.

જયશંકરે કહ્યું કે, દુનિયાએ આ વહેંચાયેલા ખતરા પ્રત્યે વધુ જાગૃત થવું પડશે અને આતંકવાદના તમામ સ્વરૂપો સામે મજબૂત સંકલ્પ સાથે એકજુટ થવું પડશે.

તેમણે સંયુક્ત રાષ્ટ્ર દિવસના અવસરે કહ્યું કે, માનવતામાં સ્પર્ધા અને સહયોગને લઈને હંમેશા ચર્ચા રહી છે. વૈશ્વિક સ્તરે આ દેશોના પરસ્પર સંબંધોમાં દેખાય છે. આઠ દાયકા પહેલા સંયુક્ત રાષ્ટ્રની સ્થાપનાએ સામૂહિક સહયોગની ભાવનાને વ્યક્ત કરી. સંયુક્ત રાષ્ટ્ર દિવસ (24 ઓક્ટોબર) પર એકજુટતાને પ્રોત્સાહન આપવું જરૂરી છે, કારણ કે વૈશ્વિક પડકારો અને તકોનો અસરકારક ઉકેલ સામૂહિક પ્રયાસોથી જ શક્ય છે.

હિન્દુસ્થાન સમાચાર / અનૂપ શર્મા / સંજીવ પાશ

હિન્દુસ્થાન સમાચાર / માધવી વ્યાસ