-31 ઓક્ટોબરના રોજ રાયપુરમાં શિવરાજ સિંહ ચૌહાણ પદયાત્રા કરશે.

રાયપુર, નવી દિલ્હી, 29 ઓક્ટોબર (હિ.સ.). ભારતીય જનતા પાર્ટીના વરિષ્ઠ નેતા અને કેન્દ્રીય સ્વાસ્થ્ય મંત્રી જેપી નડ્ડા, કેન્દ્રીય કૃષિ મંત્રી શિવરાજ સિંહ ચૌહાણ તથા ભાજપના રાષ્ટ્રીય પ્રવક્તા અને સાંસદ ડૉ. સુધાંશુ ત્રિવેદી આજે છત્તીસગઢના પ્રવાસે આવશે. આ દરમિયાન ત્રણેય નેતાઓ વિવિધ કાર્યક્રમોમાં ભાગ લેશે. નડ્ડા આજે દુર્ગમાં જનસભાને સંબોધિત કરવા ઉપરાંત પદયાત્રામાં ભાગ લેશે, જ્યારે કેન્દ્રીય કૃષિ મંત્રી શિવરાજ સિંહ ચૌહાણ 31 ઓક્ટોબરના રોજ રાયપુરમાં આયોજિત કાર્યક્રમોમાં જોડાશે.

નિર્ધારિત કાર્યક્રમ અનુસાર, નડ્ડા આજે બપોરે 1 વાગ્યે રાયપુર પહોંચશે. વિમાનમથકથી તેઓ સીધા સિવિલ લાઇન્સ સ્થિત મુખ્યમંત્રી નિવાસસ્થાને જશે. ત્યારબાદ બપોરે 3:15 વાગ્યે દુર્ગ માટે રવાના થશે. ત્યાં મહેશ કોલોની (પુલગાંવ) માં આયોજિત જનસભાને સંબોધિત કરશે. ત્યારબાદ 4 વાગ્યે ભાજપના ‘લોકતંત્ર બચાવો-અરાજકતા હટાવો’ અભિયાન હેઠળ મહેશ કોલોનીથી ગંજપારા ચોક, દુર્ગ સુધી આયોજિત પદયાત્રામાં જોડાશે.

કેન્દ્રીય કૃષિ મંત્રી શિવરાજ સિંહ ચૌહાણ, 30 ઓક્ટોબરના રોજ સાંજે 7 વાગ્યે રાયપુર પહોંચશે. તેઓ 31 ઓક્ટોબરના રોજ સવારે 10 વાગ્યે રાજધાની સ્થિત આઈસીએઆર-નેશનલ ઇન્સ્ટિટ્યૂટ ઑફ બાયોટિક સ્ટ્રેસ મેનેજમેન્ટના ખેત બચાવો અભિયાન અને વૃક્ષારોપણ કાર્યક્રમોમાં ભાગ લેશે. ત્યારબાદ બપોરે 1:30 વાગ્યે નેતાજી સુભાષ સ્ટેડિયમથી તેલીબાંધા મરીન ડ્રાઇવ સુધી આયોજિત પદયાત્રામાં જોડાશે. આ પદયાત્રા ભાજપના ‘લોકતંત્ર બચાવો-અરાજકતા હટાવો’ અભિયાન હેઠળ આયોજિત કરવામાં આવી રહી છે.

ભાજપના રાષ્ટ્રીય પ્રવક્તા ડૉ. સુધાંશુ ત્રિવેદી પણ આજે બપોરે 1 વાગ્યે રાયપુર પહોંચશે. પોતાના છત્તીસગઢ પ્રવાસ દરમિયાન તેઓ રાજધાનીમાં આયોજિત વિવિધ કાર્યક્રમોમાં ભાગ લેશે.

હિન્દુસ્થાન સમાચાર / ગેવેન્દ્ર પ્રસાદ પટેલ / કેશવ કેદારનાથ શર્મા / મુકુંદ

હિન્દુસ્થાન સમાચાર / માધવી વ્યાસ