- મસ્કતમાં 5 નવેમ્બરથી ટુર્નામેન્ટ શરૂ થશે, અન્વય દ્રવિડ વિકેટકીપર અને આર્યવીર સેહવાગ બેટ્સમેન હશે

નવી દિલ્હી, 30 ઓક્ટોબર (હિ.સ.). એશિયન ક્રિકેટ કાઉન્સિલ (એસીસી) ના અંડર-19 એશિયા કપ માટે ભારતીય ટીમની જાહેરાત કરવામાં આવી છે. ભારતીય ક્રિકેટના બે દિગ્ગજ ખેલાડીઓ રાહુલ દ્રવિડ અને વીરેન્દ્ર સેહવાગના પુત્રો અન્વય દ્રવિડ અને આર્યવીર સેહવાગને પણ 15 સભ્યોની ટીમમાં સ્થાન મળ્યું છે. મસ્કત (ઓમાન) માં 5 થી 14 નવેમ્બર દરમિયાન રમાનારી આ ટુર્નામેન્ટ માટે જુનિયર ક્રિકેટ સમિતિએ ટીમની પસંદગી કરી છે.

અન્વય દ્રવિડ વિકેટકીપર તરીકે ટીમમાં સામેલ છે, જ્યારે આર્યવીર સેહવાગને બેટ્સમેન તરીકે પસંદ કરવામાં આવ્યો છે. બંને યુવા ખેલાડીઓ માટે આ આંતરરાષ્ટ્રીય સ્તરે પોતાની પ્રતિભા દર્શાવવાનો મહત્વનો અવસર હશે. ટીમની કપ્તાની લક્ષ્ય રાયચંદાણીને સોંપવામાં આવી છે, જ્યારે યશવર્ધન સિંહ ચૌહાણ ઉપકપ્તાન હશે.

ભારતને ગ્રુપ-એ માં સંયુક્ત આરબ અમીરાત, નેપાળ અને પાકિસ્તાન સાથે રાખવામાં આવ્યું છે. ગ્રુપ-બી માં બાંગ્લાદેશ, શ્રીલંકા, અફઘાનિસ્તાન અને મલેશિયાની ટીમો સામેલ છે. બંને ગ્રુપમાંથી ટોચની બે ટીમો સેમિફાઇનલમાં પહોંચશે. સેમિફાઇનલ મેચો 12 નવેમ્બરના રોજ રમાશે, જ્યારે ફાઇનલ 14 નવેમ્બરના રોજ થશે.

ભારત પોતાના અભિયાનની શરૂઆત 6 નવેમ્બરના રોજ નેપાળ સામે કરશે. ત્યારબાદ 8 નવેમ્બરના રોજ પાકિસ્તાન અને 10 નવેમ્બરના રોજ સંયુક્ત આરબ અમીરાત સામે મુકાબલો થશે. ભારતની ત્રણેય લીગ મેચો મસ્કતના ઓસીસી ટર્ફ મેદાન પર રમાશે.

ભારતીય ટીમ : લક્ષ્ય રાયચંદાણી (કપ્તાન), આર્યવીર સેહવાગ, વી.કે. વિનીત, યશવર્ધન સિંહ ચૌહાણ (ઉપકપ્તાન), કુશાગ્ર ઓઝા, અર્જુન રાજપૂત, મનાલ ચૌહાણ, અન્વય દ્રવિડ (વિકેટકીપર), રજત બઘેલ (વિકેટકીપર), વી. યશવીર, આર્યન સાવસાણી, મોહિત ઉલ્વા, કાવ્યા પટેલ, શાવિન વિનોદ અને ઈશાન સૂદ.

હિન્દુસ્થાન સમાચાર / સુનીલ દુબે / સુનીત નિગમ

હિન્દુસ્થાન સમાચાર / માધવી વ્યાસ