વિયેના, નવી દિલ્હી, 30 ઓક્ટોબર (હિ.સ.). જર્મનીના સ્ટાર ટેનિસ ખેલાડી એલેક્ઝાન્ડર ઝ્વેરેવે, વિયેના ઓપનની ક્વાર્ટર ફાઇનલમાં સ્થાન મેળવવાની સાથે જ પહેલીવાર વિશ્વ રેન્કિંગમાં ટોચનું સ્થાન હાંસલ કરવું સુનિશ્ચિત કરી લીધું છે. ગુરુવારે રમાયેલી પ્રી-ક્વાર્ટર ફાઇનલમાં ઝ્વેરેવે, નેધરલેન્ડના ટાલોન ગ્રિક્સપુરને 6-4, 7-5થી હરાવ્યો.

સોમવારે જાહેર થનારી નવી રેન્કિંગમાં, તે ઇટાલીના યાનિક સિનરને પાછળ છોડીને દુનિયાના નંબર વન ખેલાડી બની જશે.

29 વર્ષીય ઝ્વેરેવ ફ્રેન્ચ ઓપન અને અમેરિકી ઓપનના ખિતાબ જીત્યા પછી શાનદાર લયમાં છે. તે 1991માં બોરિસ બેકર પછી વિશ્વ રેન્કિંગમાં ટોચનું સ્થાન હાંસલ કરનાર જર્મનીના બીજા પુરુષ ટેનિસ ખેલાડી હશે. વર્ષ 1973માં વિશ્વ રેન્કિંગ શરૂ થયા પછી ટોચના સ્થાને પહોંચનાર તે 30મા પુરુષ ખેલાડી બનશે.

ગ્રિક્સપુર સામે ઝ્વેરેવે દમદાર રમત બતાવી. તેણે સતત બે સેટ જીતીને મુકાબલો પોતાના નામે કર્યો. મેચનો અંત તેણે એસ (Ace) લગાવીને કર્યો. આ ઉપલબ્ધિ પછી કોર્ટ પર વિશેષ સમારોહ આયોજિત કરવામાં આવ્યો, જેમાં તેમની ટીમની સાથે ઓસ્ટ્રિયાના પૂર્વ વિશ્વ નંબર વન ખેલાડી થોમસ મસ્ટર પણ હાજર રહ્યા.

ઝ્વેરેવે કહ્યું કે, દુનિયાના શીર્ષ પર પહોંચવાનો અહેસાસ ખૂબ જ ખાસ છે. કોઈ ટુર્નામેન્ટનો ખિતાબ જીતવાથી આ ઉપલબ્ધિ અલગ છે. તેણે કહ્યું કે, નવી રેન્કિંગ જાહેર થવા પર પોતાના નામની આગળ નંબર વન જોવું તેમના માટે અવિસ્મરણીય અનુભવ હશે.

ઝ્વેરેવે એ પણ સ્વીકાર્યું કે, સિનર અને કાર્લોસ અલ્કારાઝની ઈજાઓએ તેમને ટોચના સ્થાન સુધી પહોંચવામાં થોડી મદદ કરી. સિનરે ઘૂંટણની ઈજામાંથી બહાર આવવા માટે ઓક્ટોબરની શરૂઆતમાં જ પોતાનું સત્ર સમાપ્ત કરવાનો નિર્ણય કર્યો હતો. જ્યારે, વિશ્વ રેન્કિંગમાં ત્રીજા સ્થાને રહેલા અલ્કારાઝે ગુરુવારે વિયેના ઓપનમાં નિકોલોઝ બાસિલાશ્વિલીને 6-1, 7-6 (11)થી હરાવીને ક્વાર્ટર ફાઇનલમાં પ્રવેશ કર્યો.

ઝ્વેરેવ આ પહેલા 2022માં ફ્રેન્ચ ઓપન દરમિયાન પણ વિશ્વ નંબર વન બનવાની નજીક પહોંચ્યા હતા, પરંતુ રાફેલ નડાલ સામેની સેમિફાઇનલ મેચમાં તેમના પગની ઘૂંટીના લિગામેન્ટમાં ઈજા થઈ હતી. આ કારણે તેમને આખી બાકીની સિઝનમાંથી બહાર રહેવું પડ્યું હતું.

ઝ્વેરેવે કહ્યું કે, તેમને આ ઉપલબ્ધિ માટે લાંબો ઇંતજાર કરવો પડ્યો, પરંતુ જીવનની સૌથી સારી વસ્તુઓ માટે ક્યારેક-ક્યારેક ઇંતજાર કરવો પડે છે. તેણે પોતાના શાનદાર વર્ષ માટે આભાર વ્યક્ત કરતા કહ્યું કે, તે આ ઉપલબ્ધિથી ખૂબ જ ખુશ અને ઉત્સાહિત છે.

હિન્દુસ્થાન સમાચાર / સુનિલ દુબે

હિન્દુસ્થાન સમાચાર / માધવી વ્યાસ