રાવલપિંડી, નવી દિલ્હી, 02 નવેમ્બર (હિ.સ.). પાકિસ્તાનની સેનાએ અફઘાન તાલિબાન શાસનને ચેતવણી આપી છે કે, જો તેણે પાકિસ્તાનમાં સક્રિય આતંકવાદી સંગઠનોને સમર્થન આપવાનું બંધ નહીં કર્યું, તો તેને તેના ગંભીર પરિણામો ભોગવવા પડશે. પાકિસ્તાનની સેનાના મીડિયા વિંગ, ઇન્ટર-સર્વિસિસ પબ્લિક રિલેશન્સ (આઇએસપીઆર) ના મહાનિર્દેશક લેફ્ટનન્ટ જનરલ અહેમદ શરીફ ચૌધરીએ વિદેશી મીડિયાને આપેલા એક ઇન્ટરવ્યુમાં આ વાત કહી.

લેફ્ટનન્ટ જનરલ ચૌધરીએ આરોપ લગાવ્યો કે, પાકિસ્તાનમાં આતંકવાદને પ્રોત્સાહન આપવામાં ભારતની ભૂમિકા છે અને અફઘાન તાલિબાન શાસન તેના પ્રોક્સી તરીકે કામ કરી રહ્યું છે. તેમણે તહરીક-એ-તાલિબાન પાકિસ્તાન (ટીટીપી) અને બલૂચિસ્તાન લિબરેશન આર્મી (બીએલએ) જેવા સંગઠનોને ભારતના પ્રતિનિધિ ગણાવતા અફઘાન તાલિબાન પર તેમને મદદ પહોંચાડવાનો આરોપ લગાવ્યો.

તેમણે કહ્યું કે, અફઘાન તાલિબાન પોતાના ઉદ્દેશ્યો પૂરા કરવા માટે બિન-રાજ્ય તત્વો અને ભાડૂતી લડવૈયાઓનો ઉપયોગ કરી રહ્યું છે. તેમના મતે, અફઘાનિસ્તાનમાં લાંબા સમયથી વિવિધ ગુપ્તચર એજન્સીઓ અને પ્રોક્સી જૂથોનો પ્રભાવ રહ્યો છે.

આઇએસપીઆર મહાનિર્દેશકે અફઘાનિસ્તાનમાં જૈશ અલ-અદલ, અલ-કાયદા અને ઇસ્લામિક સ્ટેટ ખુરાસાન પ્રોવિન્સ (આઇએસકેપી) જેવા આંતરરાષ્ટ્રીય આતંકવાદી સંગઠનોની હાજરીનો પણ ઉલ્લેખ કર્યો.

લેફ્ટનન્ટ જનરલ અહેમદ શરીફ ચૌધરીએ આરોપ લગાવ્યો કે, અફઘાન તાલિબાન શાસને ટીટીપી પ્રમુખ નૂર વલી મહસૂદ, બશીર ઝેબ અને ગુલ બહાદુરને આશ્રય આપ્યો છે. તેમણે એવો પણ દાવો કર્યો કે, અફઘાનિસ્તાનની જમીન પરથી પાકિસ્તાનમાં સક્રિય ઉગ્રવાદી સંગઠનો સુધી હથિયારો અને અન્ય જરૂરી સામાન પહોંચાડવામાં આવી રહ્યા છે.

તેમણે કહ્યું કે, પાકિસ્તાનની માંગ સ્પષ્ટ છે કે અફઘાન તાલિબાન પોતાની જમીનનો ઉપયોગ પાકિસ્તાન વિરુદ્ધ આતંકવાદી ગતિવિધિઓ માટે ન થવા દે અને પાકિસ્તાનમાં સક્રિય ઉગ્રવાદી સંગઠનોને કોઈપણ પ્રકારનું સમર્થન આપવાનું બંધ કરે.

આઇએસપીઆર મહાનિર્દેશકે, આંતરરાષ્ટ્રીય સમુદાયને અફઘાન તાલિબાન પર દબાણ લાવવાની અપીલ કરી. તેમણે કહ્યું કે, અફઘાન શાસને જવાબદાર રીતે વર્તવું જોઈએ, નશીલા પદાર્થોની ખેતી અને ઉત્પાદન પર રોક લગાવવી જોઈએ તથા પ્રાદેશિક સુરક્ષા સંબંધિત ચિંતાઓનું સમાધાન કરવું જોઈએ. તેમણે એ પણ કહ્યું કે, પાકિસ્તાનના સશસ્ત્ર દળો અફઘાનિસ્તાન તરફથી આવતા તમામ સંભવિત જોખમો, જેમાં ડ્રોન હુમલા પણ સામેલ છે, તેનો સામનો કરવામાં સક્ષમ છે.

આઇએસપીઆર મહાનિર્દેશક લેફ્ટનન્ટ જનરલ અહેમદ શરીફ ચૌધરીએ ચેતવણી આપી કે, જો પાકિસ્તાનની સુરક્ષા ચિંતાઓને ગંભીરતાથી લેવામાં નહીં આવે અને અફઘાન તાલિબાન પોતાની નીતિમાં ફેરફાર નહીં કરે, તો તેના ગંભીર પરિણામો આવી શકે છે.

હિન્દુસ્થાન સમાચાર / અમરેશ દ્વિવેદી

હિન્દુસ્થાન સમાચાર / ડો.હિતેશ એન.વ્યાસ