નવી દિલ્હી, 03 નવેમ્બર (હિ.સ.). ઓસ્ટ્રેલિયાના દિગ્ગજ ઓલરાઉન્ડર ગ્લેન મેક્સવેલે, આંતરરાષ્ટ્રીય ક્રિકેટમાંથી સંન્યાસની જાહેરાત કરી દીધી છે. 38 વર્ષીય મેક્સવેલની આંતરરાષ્ટ્રીય કારકિર્દી 14 વર્ષ સુધી ચાલી. તેમણે છેલ્લી વાર આઈસીસી પુરુષ ટી-20 વર્લ્ડ કપ 2026માં ઓમાન સામેની મેચમાં ભાગ લીધો હતો.

પોતાના સંન્યાસની ઘોષણા કરતા, ગ્લેન મેક્સવેલે 'ધ ફાઇનલ વર્ડ પોડકાસ્ટ' પર કહ્યું કે, આ નિર્ણય થોડો દુઃખદ છે, પરંતુ હું આંતરરાષ્ટ્રીય ક્રિકેટમાંથી સંન્યાસ લેવાની જાહેરાત કરી રહ્યો છું.

તેમણે પસંદગીકારો સાથે થયેલી વાતચીત વિશે કહ્યું કે, ટી-20 વર્લ્ડ કપ પહેલાં અને પછી અમારી ઘણી વાર ચર્ચા થઈ હતી. આ વાતચીત ખૂબ જ ખુલ્લી અને સ્પષ્ટ હતી.

પોતાની કારકિર્દી વિશે મેક્સવેલે કહ્યું કે, હું આભારી છું કે મને મારા દેશ માટે રમવાની તક મળી. જો 2009ની આસપાસ જ્યારે મેં પહેલી વાર વિક્ટોરિયાના ડ્રેસિંગ રૂમમાં પગ મૂક્યો હતો, ત્યારે કોઈએ મને આવી કારકિર્દી આપવાની વાત કહી હોત, તો હું ખુશી-ખુશી તેનો સ્વીકાર કરી લેત.

ગ્લેન મેક્સવેલના સંન્યાસ સાથે જ ઓસ્ટ્રેલિયન ક્રિકેટનો એક યાદગાર અધ્યાય સમાપ્ત થઈ ગયો છે. પોતાની આક્રમક બેટિંગ, શાનદાર ફિલ્ડિંગ અને ઉપયોગી બોલિંગના દમ પર તેમણે દુનિયાભરના ક્રિકેટ ચાહકો વચ્ચે ખાસ ઓળખ બનાવી.

મેક્સવેલે પોતાની આંતરરાષ્ટ્રીય કારકિર્દીમાં ઓસ્ટ્રેલિયાનું ત્રણેય ફોર્મેટમાં પ્રતિનિધિત્વ કર્યું. તેમણે 149 વનડે, 130 ટી-20 આંતરરાષ્ટ્રીય અને 7 ટેસ્ટ મેચો રમી. આ દરમિયાન તેઓ ઓસ્ટ્રેલિયાની બે વનડે વર્લ્ડ કપ (2015 અને 2023) તથા એક T20 વર્લ્ડ કપ (2021) જીતનારી ટીમનો હિસ્સો રહ્યા.

સફેદ બોલના ક્રિકેટમાં મેક્સવેલનું પ્રદર્શન ખૂબ જ શાનદાર રહ્યું. પોતાની વિસ્ફોટક બેટિંગ માટે જાણીતા મેક્સવેલે અનેક પ્રસંગોએ ઓસ્ટ્રેલિયાને મુશ્કેલ પરિસ્થિતિઓમાંથી બહાર કાઢ્યું. ખાસ કરીને 2023 વનડે વર્લ્ડ કપમાં અફઘાનિસ્તાન સામેની તેમની ઐતિહાસિક બેવડી સદીની ઇનિંગ્સ ક્રિકેટ ઇતિહાસની યાદગાર ઇનિંગ્સમાં સામેલ છે. તે મેચમાં તેમણે ઈજા અને મુશ્કેલ પરિસ્થિતિઓ છતાં અણનમ બેવડી સદી ફટકારીને ઓસ્ટ્રેલિયાને જીત અપાવી હતી.

મેક્સવેલની વનડે કારકિર્દીની વાત કરીએ તો, તેમણે 149 મેચોમાં 3990 રન બનાવ્યા. જ્યારે, ટી-20 આંતરરાષ્ટ્રીય ક્રિકેટમાં તેમના બેટમાંથી 2897 રન નીકળ્યા, જેમાં તેમનો સ્ટ્રાઇક રેટ 154.4નો રહ્યો. સાત ટેસ્ટમાં 339 રન બનાવ્યા. આ ઉપરાંત, મેક્સવેલે પોતાની આંતરરાષ્ટ્રીય કારકિર્દીમાં કુલ 10 સદી ફટકારી અને 136 વિકેટ પણ મેળવી.

હિન્દુસ્થાન સમાચાર / વીરેન્દ્ર સિંહ / મુકુંદ

હિન્દુસ્થાન સમાચાર / ડો.હિતેશ એન.વ્યાસ