નવી દિલ્હી, 01 નવેમ્બર (હિ.સ.). આઈસીસી વર્લ્ડ ટેસ્ટ ચેમ્પિયનશિપ (ડબ્લ્યુટીસી) 2025-27ના પોઈન્ટ્સ ટેબલમાં રોમાંચ સતત વધી રહ્યો છે. ઓસ્ટ્રેલિયા સામેની ઘરઆંગણાની ટેસ્ટ શ્રેણીમાં 2-1થી જીત નોંધાવ્યા બાદ, વર્તમાન ચેમ્પિયન દક્ષિણ આફ્રિકાએ ફરી એકવાર ટોપ-2માં સ્થાન મેળવી લીધું છે. જ્યારે, ન્યુઝીલેન્ડે ઓસ્ટ્રેલિયાને પાછળ છોડીને પોઈન્ટ્સ ટેબલમાં પ્રથમ સ્થાન હાંસલ કર્યું છે.

દક્ષિણ આફ્રિકાની જીતથી ઓસ્ટ્રેલિયાને નુકસાન થયું છે અને ટીમ હવે ત્રીજા સ્થાને પહોંચી ગઈ છે. ભારત ચોથા સ્થાને છે, જ્યારે બાંગ્લાદેશ પાંચમા નંબરે છે. હજુ ડબ્લ્યુટીસી ચક્રમાં ઘણી મહત્વપૂર્ણ ટેસ્ટ શ્રેણીઓ બાકી છે. આવા સંજોગોમાં, આગામી મેચો પોઈન્ટ્સ ટેબલનું ચિત્ર બદલી શકે છે.

ચાલો જોઈએ, ઓસ્ટ્રેલિયા સામે દક્ષિણ આફ્રિકાની શ્રેણી જીત પછી ડબ્લ્યુટીસીની તાજેતરની સ્થિતિ શું છે-

ન્યુઝીલેન્ડ

રમાયેલી મેચ: 6

જીત: 4

પોઈન્ટ્સ ટકાવારી: 72.22 ટકા

આઈસીસી અનુસાર, ન્યુઝીલેન્ડે શાનદાર પ્રદર્શન કરતા ડબ્લ્યુટીસી પોઈન્ટ્સ ટેબલમાં પ્રથમ સ્થાન હાંસલ કર્યું છે. ટીમે વેસ્ટ ઈન્ડિઝ સામેની શ્રેણીમાં 2-1થી જીત નોંધાવી હતી. આ પછી, ઈંગ્લેન્ડના પ્રવાસ પર પણ કીવી ટીમે દમદાર રમત બતાવી. ઈંગ્લેન્ડ સામેની પ્રથમ ટેસ્ટ હાર્યા બાદ, ન્યુઝીલેન્ડે સતત બે મેચ જીતીને શ્રેણી 2-1થી પોતાના નામે કરી. આ રીતે, ટીમે છ મેચમાં ચાર જીત સાથે પોતાની પોઈન્ટ્સ ટકાવારી 72.22 કરી લીધી છે.

ન્યુઝીલેન્ડને આગળ ભારત અને શ્રીલંકા સામે ઘરઆંગણાની શ્રેણી રમવાની છે. આ ઉપરાંત, ઓસ્ટ્રેલિયા અને પાકિસ્તાનનો પ્રવાસ પણ કરવાનો છે. આ મેચો ફાઇનલની રેસમાં ઘણી મહત્વપૂર્ણ રહેશે.

2. દક્ષિણ આફ્રિકા

રમાયેલી મેચ: 7

જીત: 5

પોઈન્ટ્સ ટકાવારી: 71.43 ટકા

વર્તમાન ડબ્લ્યુટીસી ચેમ્પિયન દક્ષિણ આફ્રિકાએ ઓસ્ટ્રેલિયાને ઘરઆંગણાની શ્રેણીમાં 2-1થી હરાવીને શાનદાર વાપસી કરી છે. ત્રણ ટેસ્ટ મેચોની શ્રેણીમાં પ્રોટિયાઝ ટીમ પ્રથમ મેચમાં હારી ગઈ હતી, પરંતુ તે પછી તેણે સતત બે મેચ જીતીને શ્રેણી પોતાના નામે કરી લીધી. આ પહેલા, ટીમે ભારતને તેની ધરતી પર 2-0થી હરાવ્યું હતું અને પાકિસ્તાન સામે શ્રેણી ડ્રો રમી હતી. દક્ષિણ આફ્રિકાને હવે બાંગ્લાદેશ અને ઈંગ્લેન્ડની યજમાની કરવાની છે, જ્યારે છેલ્લી શ્રેણી માટે શ્રીલંકાનો પ્રવાસ કરવો પડશે.

3. ઓસ્ટ્રેલિયા

રમાયેલી મેચ: 13

જીત: 9

પોઈન્ટ્સ ટકાવારી: 69.23 ટકા

ઓસ્ટ્રેલિયાએ ડબ્લ્યુટીસી 2025-27 અભિયાનની શરૂઆત ખૂબ જ શાનદાર રીતે કરી હતી. ટીમે વેસ્ટ ઈન્ડિઝને તેના ઘરમાં હરાવ્યું અને ઘરઆંગણે એશિઝ શ્રેણી પણ પોતાની પાસે જાળવી રાખી. જોકે, બાંગ્લાદેશ સામે મળેલી અણધારી હારથી ટીમને આંચકો લાગ્યો. આ પછી, ઓસ્ટ્રેલિયાએ વાપસી કરતા દક્ષિણ આફ્રિકાને ડરબન ટેસ્ટમાં 214 રનથી હરાવ્યું અને શ્રેણીમાં 1-0ની લીડ બનાવી લીધી, પરંતુ તે પછી પ્રોટિયાઝ ટીમે સતત બે મેચ જીતીને ઓસ્ટ્રેલિયાનું વર્ચસ્વ સમાપ્ત કરી દીધું. આ હારના કારણે ઓસ્ટ્રેલિયા પોઈન્ટ્સ ટેબલમાં પ્રથમ સ્થાનથી સરકીને ત્રીજા સ્થાને પહોંચી ગયું છે.

હવે ઓસ્ટ્રેલિયાને ન્યુઝીલેન્ડ સામે ચાર અને ભારત સામે પાંચ ટેસ્ટ મેચ રમવાની છે. ફાઇનલની રેસમાં ટકી રહેવા માટે ટીમને આ મેચોમાં વધુ સારું પ્રદર્શન કરવું પડશે.

4. ભારત

રમાયેલી મેચ: 11

જીત: 5

પોઈન્ટ્સ ટકાવારી: 51.52 ટકા

ભારતીય ટીમ માટે ડબ્લ્યુટીસી 2025-27નો પ્રવાસ અત્યાર સુધી ઉતાર-ચઢાવ ભરેલો રહ્યો છે. ઈંગ્લેન્ડ સામે ટેસ્ટ શ્રેણી ડ્રો રમ્યા બાદ, ભારતને ઘરઆંગણે દક્ષિણ આફ્રિકાના હાથે 0-2થી હારનો સામનો કરવો પડ્યો. આ હારથી ફાઇનલમાં પહોંચવાની ભારતની રાહ મુશ્કેલ બની ગઈ છે. જોકે, ટીમે શ્રીલંકાના પ્રવાસ પર 1-0થી શ્રેણી જીતીને વાપસી કરી.

ભારતને હવે ન્યુઝીલેન્ડ સામે તેના ઘરમાં બે ટેસ્ટ મેચ રમવાની છે. આ પછી, ઓસ્ટ્રેલિયા સામે પાંચ મેચની ઘરઆંગણાની શ્રેણી હશે. ફાઇનલની આશાઓ જાળવી રાખવા માટે, ભારતને આ મેચોમાં વધુમાં વધુ જીત નોંધાવવી પડશે.

5. બાંગ્લાદેશ

રમાયેલી મેચ: 7

જીત: 3

પોઈન્ટ્સ ટકાવારી: 47.62 ી

બાંગ્લાદેશે આ ડબ્લ્યુટીસી ચક્રમાં પાકિસ્તાન સામે ઘરઆંગણાની શ્રેણી જીત્યા બાદ ઓસ્ટ્રેલિયાને તેના ઘરમાં હરાવીને બધાને ચોંકાવી દીધા હતા. ઓસ્ટ્રેલિયા સામેની શ્રેણી 1-1થી ડ્રો રહી હતી.

જોકે, વેસ્ટ ઈન્ડિઝ સામેની ઘરઆંગણાની શ્રેણીની પ્રથમ ટેસ્ટમાં હારથી ટીમને પોઈન્ટ્સ ટેબલમાં નુકસાન થયું. હવે બાંગ્લાદેશની નજર શ્રેણી બરાબર કરવા પર રહેશે. આગળ ટીમને ઈંગ્લેન્ડ અને દક્ષિણ આફ્રિકા સામે રમવાનું છે.

આઈસીસી વર્લ્ડ ટેસ્ટ ચેમ્પિયનશિપના પોઈન્ટ્સ ટેબલમાં ઈંગ્લેન્ડની પુરુષ ક્રિકેટ ટીમ છઠ્ઠા સ્થાને છે. ઈંગ્લેન્ડે 16 મેચોમાં 7 જીત, 8 હાર અને 1 ડ્રો સાથે 38.54 ટકા પોઈન્ટ્સ હાંસલ કર્યા છે. ઈંગ્લેન્ડથી નીચે 7મા સ્થાને શ્રીલંકાની ટીમ છે, જેના 33.33 ટકા પોઈન્ટ્સ છે.

હિન્દુસ્થાન સમાચાર/વીરેન્દ્ર સિંહ/સંજીવ પાશ

હિન્દુસ્થાન સમાચાર / માધવી વ્યાસ