નવી દિલ્હી, 27 માર્ચ (હિ.સ.). રાષ્ટ્રપતિ દ્રૌપદી મુર્મુએ, શુક્રવારે રાષ્ટ્રપતિ ભવનમાં સેન્ટ્રલ પાવર એન્જિનિયરિંગ સર્વિસ (સીપીઈએસ) અને ઇન્ડિયન ઇકોનોમિક સર્વિસ (આઈઈએસ) ના અધિકારીઓ સાથે મુલાકાત કરી અને તેમને રાષ્ટ્રના સર્વાંગી વિકાસમાં મહત્વપૂર્ણ યોગદાન આપવા માટે પ્રોત્સાહિત કર્યા.

રાષ્ટ્રપતિએ કહ્યું કે, આ અધિકારીઓ દેશની પ્રગતિમાં મોખરે છે અને તેમના નિર્ણયો દેશને મજબૂત અને આત્મનિર્ભર બનાવવામાં મદદ કરશે. તેમણે અધિકારીઓને સમર્પણ અને જુસ્સા સાથે કામ કરવાની, પડકારોને તક તરીકે સ્વીકારવાની અને નવીનતા અને સતત શીખવાની ભાવના જાળવવાની સલાહ આપી.

રાષ્ટ્રપતિએ કહ્યું કે, વીજળી ઔદ્યોગિક વિકાસ, નવીનતા અને સુધારેલા જીવનધોરણનો આધારસ્તંભ છે. આ સેવા ઉત્પાદન, ટ્રાન્સમિશન અને વિતરણના ક્ષેત્રોમાં નોંધપાત્ર યોગદાન આપી રહી છે, અને દેશના ઉર્જા માળખાને મજબૂત બનાવવામાં તેની ભૂમિકા મહત્વપૂર્ણ છે. તેમણે કહ્યું કે, બદલાતા વૈશ્વિક અને સ્થાનિક પરિદૃશ્યમાં, આર્થિક નીતિ ઘડતર અને તેના અસરકારક અમલીકરણ પહેલા કરતાં વધુ મહત્વપૂર્ણ બની ગયા છે. આ અધિકારીઓની ભૂમિકા ટકાઉ વિકાસ સુનિશ્ચિત કરવા, ફુગાવાને નિયંત્રિત કરવા, રોજગારીનું સર્જન કરવા અને અસમાનતા ઘટાડવામાં મહત્વપૂર્ણ રહેશે.

તેમણે અધિકારીઓને હંમેશા યાદ રાખવાની સલાહ આપી કે, દરેક આંકડા પાછળ એક માનવીય વાર્તા છુપાયેલી હોય છે. આર્થિક નીતિની સાચી કસોટી માત્ર આંકડા નથી, પરંતુ તેના પરિણામો છે. તેનો ઉદ્દેશ્ય લોકોના જીવનને સુધારવાનો હોવો જોઈએ, ખાસ કરીને જેઓ સૌથી વધુ સંવેદનશીલ છે.

હિન્દુસ્થાન સમાચાર / સુશીલ કુમાર / પવન કુમાર

હિન્દુસ્થાન સમાચાર / ડો.હિતેશ એન.વ્યાસ