ભુવનેશ્વર, નવી દિલ્હી, 06 માર્ચ (હિ.સ.). કેન્દ્રીય ગૃહમંત્રી અમિત શાહે શુક્રવારે જાહેરાત કરી હતી કે, ભારત 31 માર્ચ, 2026 સુધીમાં નક્સલવાદથી સંપૂર્ણપણે મુક્ત થઈ જશે. તેમણે કહ્યું કે, સુરક્ષા દળોના સતત ઓપરેશન અને કેન્દ્ર સરકારના દૃઢ નિશ્ચયને કારણે દેશ હવે આ સમસ્યામાંથી મુક્તિના અંતિમ તબક્કામાં પહોંચી ગયો છે. કટકના મુંડુલીમાં કેન્દ્રીય ઔદ્યોગિક સુરક્ષા દળ (સીઆઈએસએફ) ના 57મા સ્થાપના દિવસ સમારોહને સંબોધતા શાહે કહ્યું કે કેન્દ્ર સરકાર દેશમાંથી નક્સલવાદને સંપૂર્ણપણે નાબૂદ કરવા માટે પ્રતિબદ્ધ છે.

તેમણે કહ્યું, હું દેશવાસીઓને ખાતરી આપું છું કે 31 માર્ચ સુધીમાં ભારત નક્સલવાદથી મુક્ત થઈ જશે. શાહે કહ્યું કે, સુરક્ષા દળોના સંકલિત અને સતત ઓપરેશનને કારણે, દેશ હવે આ દાયકાઓ જૂની સમસ્યામાંથી મુક્તિ મેળવવાના ઉંબરે છે.

તેમણે એમ પણ કહ્યું કે, નરેન્દ્ર મોદીના નેતૃત્વ હેઠળની સરકાર નિર્ધારિત સમયમર્યાદામાં નક્સલવાદને નાબૂદ કરવા માટે પ્રતિબદ્ધ છે, અને સીઆઈએસએફ એ આ દિશામાં મહત્વપૂર્ણ ભૂમિકા ભજવી છે.

શાહે કહ્યું, ઓડિશા હોય, છત્તીસગઢ હોય કે તેલંગાણા, સીઆઈએસએફ એ નક્સલવાદ સામેની લડાઈમાં મહત્વપૂર્ણ યોગદાન આપ્યું છે.

તેમણે કહેવાતા રેડ કોરિડોર ની વિભાવના પર પણ પ્રહાર કરતા કહ્યું કે, સુરક્ષા દળો તિરુપતિથી પશુપતિ સુધી રેડ કોરિડોર બનાવવાનું સ્વપ્ન જોનારાઓને સંપૂર્ણપણે હરાવી દેશે. તેમણે કહ્યું, વડાપ્રધાન નરેન્દ્ર મોદીના નેતૃત્વમાં, આપણા સુરક્ષા દળો આ પડકારને સંપૂર્ણપણે નાબૂદ કરશે, જે એક મોટી સિદ્ધિ હશે.

આ પહેલા, અમિત શાહ ભુવનેશ્વર પહોંચ્યા, જ્યાં તેમનું સ્વાગત ઓડિશાના મુખ્યમંત્રી મોહન માઝી, નાયબ મુખ્યમંત્રી પ્રભાતી પરિડા અને પ્રદેશ ભાજપ પ્રમુખ મનમોહન સામલ સહિત અન્ય નેતાઓએ કર્યું. ત્યારબાદ તેઓ સીઆઈએસએફ ના સ્થાપના દિવસ સમારોહમાં હાજરી આપવા માટે મુંડાલી ગયા.

તેમના સંબોધનમાં, કેન્દ્રીય ગૃહમંત્રીએ દેશના મહત્વપૂર્ણ ઔદ્યોગિક એકમો અને સ્થાપનાઓનું રક્ષણ કરવામાં સીઆઈએસએફ ના યોગદાનની પ્રશંસા કરી.

તેમણે કહ્યું, સીઆઈએસએફ ના 57મા સ્થાપના દિવસ નિમિત્તે, હું રાષ્ટ્રની સુરક્ષા પ્રત્યેના સમર્પણ બદલ તમામ કર્મચારીઓ અને તેમના પરિવારોનો આભાર માનું છું. ભારતને વિશ્વની અગ્રણી અર્થવ્યવસ્થા બનવા માટે ઔદ્યોગિક વિકાસ જરૂરી છે, અને તે વિકાસને સુરક્ષિત રાખવા માટે રાષ્ટ્રીય સ્તરની ઔદ્યોગિક સુરક્ષા દળની જરૂર છે.

શાહે કહ્યું કે, છેલ્લા 56 વર્ષોમાં, સીઆઈએસએફ એ માત્ર પોતાની જવાબદારીઓ તાકાતથી પૂર્ણ કરી નથી, પરંતુ બદલાતા સુરક્ષા પડકારોનો સામનો કરવા માટે પોતાને આધુનિક પણ બનાવ્યું છે.

તેમણે કહ્યું, વીરતા, બલિદાન અને આત્મ બલિદાન ભારતના ગૌરવશાળી ઇતિહાસના મુખ્ય લક્ષણો છે. આ મૂલ્યોને સમર્પણ અને આધુનિક શસ્ત્રો સાથે જોડીને, સીઆઈએસએફ એ દરેક પડકારનો સામનો કરવાની હિંમત દર્શાવી છે.

શાહે કહ્યું કે, વિકસિત ભારત 2047 ના લક્ષ્યને પ્રાપ્ત કરવામાં અને દેશના ઔદ્યોગિક વિસ્તરણને સુરક્ષિત રાખવામાં સીઆઈએસએફ ની ભૂમિકા મહત્વપૂર્ણ રહેશે.

હિન્દુસ્થાન સમાચાર / સુનિતા મહંતો / સત્યવાન

હિન્દુસ્થાન સમાચાર / માધવી વ્યાસ