અમરેલી, 11 એપ્રિલ (હિ.સ.) અમરેલી જિલ્લામાં ફરી એકવાર ધરતીકંપના આંચકાએ લોકોને ચિંતિત કરી દીધા છે. સાવરકુંડલા તાલુકાના મીતીયાળા વિસ્તારમાં આજે વહેલી સવારે 2.5 તીવ્રતાનો ભૂકંપનો આંચકો નોંધાયો હતો. ભૂકંપનું કેન્દ્રબિંદુ અમરેલીથી આશરે 42 કિલોમીટર દૂર નોંધાયું હોવાનું જાણવા મળ્યું છે. આ આંચકાના કારણે મીતીયાળા સહિત આસપાસના સાકરપરા, ધજડી, ભાડ, ખાંભા અને ઈંગોરાળા ગામોમાં લોકોમાં થોડી દહેશત ફેલાઈ હતી.
સ્થાનિક લોકોના જણાવ્યા અનુસાર, ભૂકંપનો આંચકો ટૂંકો પરંતુ સ્પષ્ટ અનુભવાયો હતો, જેના કારણે ઘણા લોકો ઘરમાંથી બહાર નીકળી ગયા હતા. ખાસ કરીને મીતીયાળા વિસ્તારમાં છેલ્લા કેટલાક દિવસોથી ભૂકંપીય પ્રવૃત્તિમાં વધારો જોવા મળી રહ્યો છે. માત્ર બે દિવસ પહેલા જ 24 કલાકની અંદર 14 જેટલા આંચકા નોંધાયા હતા, જે લોકો માટે ચિંતાનો વિષય બન્યો છે.
Gandhinagar Seismology Department દ્વારા પણ આ ભૂકંપના આંચકાની સત્તાવાર પુષ્ટિ કરવામાં આવી છે. હાલ કોઈ જાનહાનિ કે મોટું નુકસાન થયાની માહિતી મળી નથી, છતાં પ્રશાસન પરિસ્થિતિ પર નજર રાખી રહ્યું છે. સ્થાનિકોને સાવચેત રહેવા અને અફવાઓથી દૂર રહેવા સૂચના આપવામાં આવી છે.
---------------
હિન્દુસ્થાન સમાચાર / Gondaliya Abhishek Nandrambhai
