કચ્છ, 15 એપ્રિલ (હિ.સ.) : કંડલા બંદર હવે વૈશ્વિક શિપબિલ્ડિંગ અને શિપ રિપેર ક્ષેત્રમાં પોતાની મજબૂત હાજરી નોંધાવવા તરફ આગળ વધી રહ્યું છે. તાજેતરમાં જાપાનના પ્રતિનિધિમંડળે દીનદયાળ પોર્ટ ઓથોરિટી (DPA), કંડલાના અધ્યક્ષ સાથે મુલાકાત કરી અને શિપબિલ્ડિંગ તથા શિપ રિપેર ક્ષેત્રમાં સહકારના નવા અવસરો અંગે વિસ્તૃત ચર્ચા કરી.

આ મહત્વપૂર્ણ મુલાકાત દરમિયાન DPA કંડલાના અધ્યક્ષ શ્રી સુશિલ કુમાર સિંહ (IRSME) એ પ્રતિનિધિમંડળને આવનારા વિકાસ પ્રોજેક્ટ્સ અંગે વિગતવાર માહિતી આપી. તેમણે ખાસ કરીને રાષ્ટ્રીય શિપબિલ્ડિંગ મિશન અને “મેરિટાઈમ ઈન્ડિયા વિઝન” હેઠળ કંડલાની વ્યૂહાત્મક ભૂમિકા પર ભાર મૂક્યો. તેમણે જણાવ્યું કે આ પ્રોજેક્ટ્સ દેશના મેરિટાઈમ સેક્ટરને નવી દિશા આપશે અને ભારતને વૈશ્વિક સ્તરે મજબૂત બનાવશે.

જાપાની પ્રતિનિધિમંડળે માત્ર ચર્ચા સુધી મર્યાદિત ન રહી, પરંતુ કંડલા અને વીરા વિસ્તારમાં પ્રસ્તાવિત શિપયાર્ડના સ્થળોની મુલાકાત પણ લીધી. આ મુલાકાત દરમિયાન તેમને પ્રોજેક્ટ્સના વ્યાપ, વિકાસ ક્ષમતા અને ઈન્ફ્રાસ્ટ્રક્ચરલ શક્યતાઓ અંગે firsthand માહિતી મળી. કંડલા અને વીરા વિસ્તાર ભવિષ્યમાં શિપબિલ્ડિંગ અને રિપેરિંગ માટે એક મહત્વપૂર્ણ કેન્દ્ર બની શકે તેવો વિશ્વાસ વ્યક્ત કરવામાં આવ્યો.

વિશ્વસ્તરીય ટેક્નોલોજી અને અનુભવ ધરાવતા જાપાન સાથેનો આ સંવાદ કંડલા માટે ગેમ-ચેન્જર સાબિત થઈ શકે છે. આ સહકારથી નવી રોજગારી તકો સર્જાશે, ટેક્નોલોજી ટ્રાન્સફર થશે અને સ્થાનિક અર્થતંત્રને પણ મોટો વેગ મળશે.

આ સમગ્ર ઘટનાક્રમથી સ્પષ્ટ થાય છે કે કંડલા હવે માત્ર એક બંદર નથી, પરંતુ ભારતના મેરિટાઈમ ભવિષ્યનું મહત્વપૂર્ણ કેન્દ્ર બનવાની દિશામાં ઝડપી ગતિએ આગળ વધી રહ્યું છે.

---------------

હિન્દુસ્થાન સમાચાર / Rohit R. Padhiyar