અમરેલી, 04 મે (હિ.સ.) અમરેલી જિલ્લામાં ધારી-અમરેલી હાઇવે પર મોડી રાત્રે આશ્ચર્યજનક દ્રશ્ય સામે આવ્યું હતું, જેમાં એકસાથે 8 Asiatic lion નો કાફલો રોડ ક્રોસ કરતો જોવા મળ્યો હતો. આ દ્રશ્ય એક જેસીબીના ડ્રાઇવરે પોતાના મોબાઇલ કેમેરામાં કેદ કર્યું હતું, જે હાલ સોશિયલ મીડિયામાં ઝડપથી વાયરલ થઈ રહ્યું છે.

માહિતી મુજબ, સિંહોનો આ પરિવાર શિકારની શોધમાં જંગલ વિસ્તાર છોડીને હાઇવે પર આવી પહોંચ્યો હતો. થોડા સમય માટે સમગ્ર માર્ગ પર વાહન વ્યવહાર ધીમો પડી ગયો હતો અને વાહનચાલકોમાં ઉત્સુકતા સાથે થોડો ભયનો માહોલ પણ સર્જાયો હતો.

ધારી અને આસપાસના વિસ્તારો Gir Forest National Park નજીક હોવાથી અહીં સિંહોની મોટી સંખ્યામાં વસતિ જોવા મળે છે. આ ઘટનાએ ફરી એકવાર સાબિત કર્યું છે કે અમરેલી જિલ્લામાં સિંહોની સંખ્યા નોંધપાત્ર રીતે વધી રહી છે અને તેઓ માનવ વસાહતોની નજીક સુધી પહોંચતા થયા છે.

વન વિભાગ દ્વારા વાહનચાલકોને ખાસ સાવચેતી રાખવા અને રાત્રિના સમયે હાઇવે પર ધીમે વાહન ચલાવવા સૂચના આપવામાં આવી છે.

---------------

હિન્દુસ્થાન સમાચાર / Gondaliya Abhishek Nandrambhai