નવી દિલ્હી, 12 જૂન (હિ.સ.) ફિફા વર્લ્ડ કપ 2026માં ઇંગ્લેન્ડ ફરી એકવાર તે ખિતાબ જીતવાના લક્ષ્ય સાથે મેદાનમાં ઉતરશે, જેની તેને 1966 પછીથી રાહ છે. અગાઉની અનેક પેઢીઓની જેમ આ વખતે પણ ટીમ પ્રતિભાશાળી ખેલાડીઓથી સજ્જ છે, પરંતુ આ વખતે નેતૃત્વમાં સ્પષ્ટ બદલાવ જોવા મળે છે. જર્મન કોચ થોમસ ટ્યુશેલના માર્ગદર્શન હેઠળ ઇંગ્લેન્ડ નવી વિચારધારા અને સ્પષ્ટ વ્યૂહરચના સાથે ટૂર્નામેન્ટમાં પ્રવેશ કરશે.

ઇંગ્લેન્ડનો ફિફા વર્લ્ડ કપમાં પ્રથમ મુકાબલો 18 જૂને ક્રોએશિયા સામે રમાશે.

ટ્યુશેલની નિમણૂક શરૂઆતમાં ચર્ચા અને ટીકાનો વિષય બની હતી, પરંતુ તેમના નેતૃત્વ હેઠળ ઇંગ્લેન્ડે વર્લ્ડ કપ ક્વોલિફાયર સ્પર્ધાઓમાં શાનદાર દેખાવ કર્યો હતો. ટીમે આઠેય મેચોમાં જીત મેળવી હતી અને સમગ્ર અભિયાન દરમિયાન એકપણ ગોલ સ્વીકાર્યો નહોતો. જેના કારણે ખેલાડીઓનો આત્મવિશ્વાસ નોંધપાત્ર રીતે વધ્યો છે.

આ વખતે ઇંગ્લેન્ડની સૌથી મોટી તાકાત તેનું સંતુલિત આક્રમણ માનવામાં આવે છે. કેપ્ટન હેરી કેન હજુ પણ ટીમના મુખ્ય ગોલસ્કોરર છે, પરંતુ તેમની આસપાસ માર્કસ રેશફોર્ડ, બુકાયો સાકા, એન્થની ગોર્ડન અને મોર્ગન રોજર્સ જેવા ઝડપી અને સર્જનાત્મક ખેલાડીઓ હાજર છે. ટીમની વ્યૂહરચના કેનની ગોલ કરવાની ક્ષમતા અને રમતનું નિર્માણ કરવાની તેમની કળા બંનેનો મહત્તમ ઉપયોગ કરવા પર આધારિત રહેશે.

મધ્ય હરોળમાં ડેક્લાન રાઇસ પર મોટી જવાબદારી રહેશે. તેમની સાથે યુવા ખેલાડી ઇલિયટ એન્ડરસન ટીમને સંતુલન આપવાનો પ્રયાસ કરશે. જ્યારે જુડ બેલિંગહામ પાસેથી પણ મહત્વપૂર્ણ યોગદાનની અપેક્ષા રાખવામાં આવી રહી છે.

જોકે ઇંગ્લેન્ડ માટે સંરક્ષણ પંક્તિ હજુ પણ ચિંતાનો વિષય છે. જ્હોન સ્ટોન્સ અને રીસ જેમ્સ ઇજાઓથી પરેશાન રહ્યા છે, જ્યારે ઘણા યુવા ખેલાડીઓ પાસે મોટા ટૂર્નામેન્ટનો મર્યાદિત અનુભવ છે. ગોલકીપર જોર્ડન પિકફોર્ડ ટીમના સૌથી વિશ્વસનીય ખેલાડીઓમાંના એક છે.

વર્લ્ડ કપ દરમિયાન વિવિધ પરિસ્થિતિઓ પણ ઇંગ્લેન્ડની કસોટી કરશે. ઊંચાઈવાળા મેદાનો અને ગરમ હવામાનમાં રમવાની પડકારજનક સ્થિતિ ટીમ માટે નિર્ણાયક સાબિત થઈ શકે છે.

નજર રાખવા લાયક ખેલાડી : હેરી કેન

ઇંગ્લેન્ડ માટે સૌથી વધુ ગોલ કરનાર ખેલાડી હેરી કેન ફરી એકવાર ટીમની આશાઓનું કેન્દ્ર રહેશે. 2018ના વર્લ્ડ કપમાં ગોલ્ડન બૂટ જીતનાર કેન આ વખતે ખિતાબ સાથે પોતાની કારકિર્દીને નવી ઊંચાઈ આપવા ઇચ્છશે.

કોચ : થોમસ ટ્યુશેલ

યુરોપના સફળ કોચોમાં સ્થાન ધરાવતા થોમસ ટ્યુશેલ અગાઉ ક્લબ સ્તરે અનેક મોટા ખિતાબો જીતી ચૂક્યા છે. ઇંગ્લેન્ડને આશા છે કે તેમનો અનુભવ ટીમને નોકઆઉટ તબક્કામાં વધુ મજબૂતી આપશે.

સંભવિત પ્રારંભિક એકાદશ

જોર્ડન પિકફોર્ડ; રીસ જેમ્સ, જ્હોન સ્ટોન્સ, માર્ક ગુએહી, નિકો ઓ'રાઇલી; ઇલિયટ એન્ડરસન, ડેક્લાન રાઇસ; બુકાયો સાકા, મોર્ગન રોજર્સ, માર્કસ રેશફોર્ડ/એન્થની ગોર્ડન; હેરી કેન.

વર્લ્ડ કપ રેકોર્ડ

-

ભાગીદારી : 16 વખત

-

શ્રેષ્ઠ પ્રદર્શન : ચેમ્પિયન (1966)

-

ફિફા ક્રમસૂચિ : 4મું સ્થાન

-

કુલ મેચ : 74

-

જીત : 32

-

ડ્રો : 22

-

હાર : 20

-

હાલમાં સૌથી વધુ ગોલ કરનાર ખેલાડી : હેરી કેન (78 ગોલ)

હિંદુસ્થાન સમાચાર / સુનીલ દુબે

હિન્દુસ્થાન સમાચાર / ડો.હિતેશ એન.વ્યાસ