ગ્વાડલાહારા, નવી દિલ્હી, 12 જૂન (હિ.સ.) ફિફા વર્લ્ડ કપ 2026ની મેચમાં દક્ષિણ કોરિયાએ શાનદાર વાપસી કરતાં ચેક ગણરાજ્યને 2-1થી હરાવી વિજય નોંધાવ્યો. ગ્વાડલાહારા સ્ટેડિયમમાં ભારતીય સમય મુજબ શુક્રવારે સવારે રમાયેલી આ મેચમાં હ્વાંગ ઇન-બોમે એક ગોલ કર્યો અને એક ગોલમાં સહાયતા આપીને જીતના હીરો બન્યા.

પ્રથમ હાફમાં બંને ટીમો અપેક્ષિત પ્રદર્શન કરી શકી નહોતી, જેના કારણે દર્શકોએ પણ નિરાશા વ્યક્ત કરી હતી. ગોલવિહોણા પ્રથમ હાફ બાદ મેચમાં રોમાંચ બીજા હાફમાં જોવા મળ્યો.

59મી મિનિટે ચેક ગણરાજ્યએ આગવી લીડ મેળવી. કેપ્ટન લાડિસ્લાવ ક્રેજીએ, પેનલ્ટી વિસ્તારમાં મળેલા લાંબા થ્રોને હેડર દ્વારા ગોલમાં ફેરવી પોતાની ટીમને 1-0ની સરસાઈ અપાવી.

જોકે દક્ષિણ કોરિયાએ ટૂંક સમયમાં જ વાપસી કરી. 67મી મિનિટે હ્વાંગ ઇન-બોમે પોતાની શાનદાર વ્યક્તિગત કુશળતાનું પ્રદર્શન કરતાં બે ડિફેન્ડરોને પાછળ છોડ્યા અને અદ્ભુત ગોલ ફટકારી સ્કોર 1-1થી બરાબર કર્યો.

ત્યારબાદ 80મી મિનિટે હ્વાંગે જમણી બાજુથી ઉત્તમ ક્રોસ આપ્યો, જેના પર ઓ હ્યોન-ગ્યુએ ગોલ કરીને દક્ષિણ કોરિયાને નિર્ણાયક લીડ અપાવી.

સ્ટાર ફોરવર્ડ સોન હ્યુન્ગ-મિનની આગેવાની હેઠળ દક્ષિણ કોરિયાએ સમગ્ર મેચ દરમિયાન બોલ પર નિયંત્રણ જાળવી રાખ્યું અને ચેક ટીમ પર સતત દબાણ બનાવ્યું. ફિફા રેન્કિંગમાં 25મા ક્રમે રહેલી કોરિયન ટીમે 38મા ક્રમે રહેલી ચેક ટીમની સરખામણીએ વધુ તકો ઊભી કરી અને અંતે જીત હાંસલ કરી.

આ ચેક ગણરાજ્યની 2006 પછીની પ્રથમ વર્લ્ડ કપ મેચ હતી, પરંતુ ટીમ મેચમાં વાપસી કરવામાં નિષ્ફળ રહી.

સ્ટેડિયમની ક્ષમતા 45,664 દર્શકોની હોવા છતાં સત્તાવાર દર્શક સંખ્યા 44,985 નોંધાઈ હતી, જોકે સ્ટેડિયમના ઘણા વિભાગોમાં બેઠકો ખાલી જોવા મળી હતી.

હિન્દુસ્થાન સમાચાર / સુનીલ દુબે

હિન્દુસ્થાન સમાચાર / ડો.હિતેશ એન.વ્યાસ