નવી દિલ્હી, 02 જૂન (હિ.સ.) ફરહાન અખ્તરની પ્રોડક્શન કંપની એક્સેલ એન્ટરટેઇનમેન્ટના બેનર હેઠળ બનેલી મણિપુરી ફિલ્મ 'બૂંગ'એ, ન્યૂયોર્ક ઇન્ડિયન ફિલ્મ ફેસ્ટિવલમાં શાનદાર સફળતા હાંસલ કરીને ઇતિહાસ રચ્યો છે. 28 થી 31 મે સુધી આયોજિત આ પ્રતિષ્ઠિત ફિલ્મ મહોત્સવનો સમાપન પુરસ્કાર સમારોહ સાથે થયો, જેમાં ભારતીય સિનેમાની વિવિધ ભાષાઓ અને શૈલીઓની ફિલ્મોને સન્માનિત કરવામાં આવી. 'બૂંગ' ત્રણ પુરસ્કાર જીતીને સમારોહની સૌથી મોટી વિજેતા બનીને ઉભરી.

ફિલ્મને 'શ્રેષ્ઠ ડેબ્યૂ ફિલ્મ'નો પુરસ્કાર મળ્યો, જ્યારે તેની નિર્દેશક લક્ષ્મીપ્રિયા દેવીને 'શ્રેષ્ઠ નિર્દેશક'ના સન્માનથી નવાજવામાં આવ્યા. આ ઉપરાંત ફિલ્મના યુવા કલાકાર ગુગુન કિપગેને 'શ્રેષ્ઠ બાળ કલાકાર'નો પુરસ્કાર પોતાના નામે કર્યો. ન્યૂયોર્ક ઇન્ડિયન ફિલ્મ ફેસ્ટિવલમાં 15 ભાષાઓની ફિલ્મોનું પ્રદર્શન કરવામાં આવ્યું હતું અને કડક સ્પર્ધા વચ્ચે 'બૂંગ'ની આ સિદ્ધિને ભારતીય સિનેમા માટે મોટી સફળતા માનવામાં આવી રહી છે.

'બૂંગ' એક સંવેદનશીલ અને ભાવનાત્મક વાર્તા છે, જે મણિપુરની ખીણમાં રહેતા એક નિર્દોષ છોકરાની આસપાસ ફરે છે. પોતાની માતાના એકલતા અને પરિવારની મુશ્કેલ પરિસ્થિતિઓ જોઈને તે તેમને ખુશ કરવા માટે પોતાના પિતાને પાછા લાવવાનો નિર્ધાર કરે છે. આ સફરમાં તેને ઘણી ભાવનાત્મક અને પડકારજનક પરિસ્થિતિઓનો સામનો કરવો પડે છે.

નોંધનીય છે કે, આ ફિલ્મ પહેલાથી જ 'બાફ્ટા 2026'માં 'બેસ્ટ ચિલ્ડ્રન એન્ડ ફેમિલી ફિલ્મ'નો પુરસ્કાર જીતીને આંતરરાષ્ટ્રીય સ્તરે ઓળખ બનાવી ચૂકી છે.

હિન્દુસ્થાન સમાચાર / લોકેશ ચંદ્ર દુબે / રામાનુજ શર્મા

હિન્દુસ્થાન સમાચાર / માધવી વ્યાસ