ભાવનગર, 28 જૂન (હિ.સ.)બોટાદ જિલ્લાના ગઢડા તાલુકાના ગોરડકા ગામના વીરાવાડી પરા વિસ્તારમાં મહિલાઓની સુવિધા અને સ્વચ્છતાને પ્રાથમિકતા આપતા મહિલાઓ માટેના સ્નાનગૃહના નિર્માણ કાર્યનું ખાતમુહૂર્ત કરવામાં આવ્યું હતું. આ પ્રસંગે સ્થાનિક આગેવાનો, ગ્રામજનો અને મહિલાઓની ઉપસ્થિતિમાં કાર્યક્રમ યોજાયો હતો.

કાર્યક્રમમાં બોટાદ જિલ્લા પંચાયતના કારોબારી ચેરમેન ચંદુભાઈ તેમજ ગોરડકા ગ્રામ પંચાયતના સરપંચ રાજેશભાઈ સોલંકી સહિતના મહાનુભાવો ઉપસ્થિત રહ્યા હતા. મહાનુભાવોએ વિધિવત પૂજન-અર્ચન કરીને સ્નાનગૃહના નિર્માણ કાર્યનો શુભ પ્રારંભ કરાવ્યો હતો.

પ્રસંગે વક્તાઓએ જણાવ્યું હતું કે ગ્રામ્ય વિસ્તારોમાં મહિલાઓ માટે સ્વચ્છ અને સુરક્ષિત સ્નાનગૃહની સુવિધા ઉપલબ્ધ કરાવવી સમયની જરૂરિયાત છે. આ સુવિધાથી મહિલાઓને ગોપનીયતા, સ્વચ્છતા અને આરોગ્ય સંબંધિત અનેક લાભો મળશે. ગ્રામ પંચાયત દ્વારા ગામના સર્વાંગી વિકાસ સાથે મહિલાઓની સુખાકારીને પણ વિશેષ મહત્વ આપવામાં આવી રહ્યું છે.

ગોરડકા ગ્રામ પંચાયત દ્વારા વિવિધ વિકાસલક્ષી યોજનાઓ અંતર્ગત રસ્તા, પીવાના પાણી, સ્વચ્છતા અને અન્ય પાયાની સુવિધાઓ માટે સતત કામગીરી કરવામાં આવી રહી છે. મહિલાઓ માટેનું આ સ્નાનગૃહ પણ તે જ વિકાસયાત્રાનો એક મહત્વપૂર્ણ ભાગ બનશે.

સ્થાનિક ગ્રામજનોએ પણ આ કામગીરીને આવકારી હતી અને જણાવ્યું હતું કે, લાંબા સમયથી મહિલાઓ માટે આવી સુવિધાની જરૂરિયાત અનુભવાતી હતી. હવે સ્નાનગૃહના નિર્માણથી ખાસ કરીને મહિલાઓ અને યુવતીઓને મોટી રાહત મળશે.

કાર્યક્રમ અંતે ઉપસ્થિત આગેવાનોએ ગામના વિકાસ માટે સૌના સહયોગની જરૂરિયાત પર ભાર મૂક્યો હતો અને નિર્માણ કાર્ય ગુણવત્તાપૂર્વક તથા સમયમર્યાદામાં પૂર્ણ કરવાની આશા વ્યક્ત કરી હતી. સમગ્ર કાર્યક્રમ સૌહાર્દપૂર્ણ વાતાવરણમાં સંપન્ન થયો હતો.

---------------

હિન્દુસ્થાન સમાચાર / DISHANT NANDRAMBHAI GONADLIYA