નવી દિલ્હી, 13 જુલાઈ (હિ.સ.) અભિનેતા સલમાન ખાનની બહુપ્રતિક્ષિત ફિલ્મ 'માતૃભૂમિ: મેય વોર રેસ્ટ ઇન પીસ'ની રિલીઝને લઈને અનિશ્ચિતતા યથાવત્ છે. અગાઉ આ ફિલ્મને ઓગસ્ટમાં સિનેમાઘરોમાં રિલીઝ કરવાની યોજના હતી, પરંતુ હવે આ વર્ષે તેની રિલીઝ થવાની શક્યતા ઘણી ઓછી દેખાઈ રહી છે. અહેવાલો મુજબ, ફિલ્મ સાથે જોડાયેલા કેટલાક લંબિત મુદ્દાઓને કારણે તેની રિલીઝ સતત ટળી રહી છે.

અહેવાલ અનુસાર, ફિલ્મને રિલીઝ કરવા માટેના પ્રયાસો ચાલુ છે, પરંતુ જો હાલની સમસ્યાઓનો વહેલી તકે ઉકેલ નહીં આવે તો તેને વર્ષ 2027 સુધી ટાળી શકાય છે. સૂત્રોનું કહેવું છે કે જો વિવાદ ઝડપથી ઉકેલાઈ પણ જાય, તો પણ યોગ્ય રિલીઝ તારીખ મેળવવી સરળ નહીં હોય, કારણ કે મોટાભાગની મુખ્ય તારીખો પહેલેથી જ બુક થઈ ચૂકી છે. જણાવવામાં આવ્યું છે કે, સલમાન ખાન કોઈ અન્ય મોટી ફિલ્મ સાથે બોક્સ ઓફિસ ટક્કર ટાળવાનું પસંદ કરે છે અને આ જ કારણે ઉતાવળમાં રિલીઝનો નિર્ણય લેવામાં નહીં આવે.

અહેવાલમાં એ પણ દાવો કરવામાં આવ્યો છે કે, જો 'માતૃભૂમિ' આગામી વર્ષ સુધી ટળે છે, તો 2027માં સલમાન ખાનની બે મોટી ફિલ્મો રિલીઝ થઈ શકે છે. તેમની બીજી ફિલ્મ 'એસવીસી63', જેમાં અભિનેત્રી નયનતારા પણ જોવા મળશે, જે ઈદ 2027ના અવસરે રિલીઝ માટે નિર્ધારિત હોવાનું જણાવવામાં આવી રહ્યું છે.

અપૂર્વ લાખિયાના દિગ્દર્શનમાં બનેલી 'માતૃભૂમિ: મેય વોર રેસ્ટ ઇન પીસ' વર્ષ 2020માં ભારત અને ચીન વચ્ચે થયેલા ગલવાન ઘાટી સંઘર્ષની પૃષ્ઠભૂમિ પર આધારિત છે. જણાવવામાં આવી રહ્યું છે કે, ફિલ્મની વિષયવસ્તુને લઈને ઉઠેલી આપત્તિઓના કારણે તેને હજી સુધી કેન્દ્રીય ફિલ્મ પ્રમાણન બોર્ડ (સીબીએફસી) તરફથી અંતિમ પ્રમાણપત્ર મળ્યું નથી. આવા સંજોગોમાં ફિલ્મની રિલીઝ અંગેનો અંતિમ નિર્ણય સેન્સર પ્રક્રિયા પૂર્ણ થયા બાદ જ લેવામાં આવશે.

હિન્દુસ્થાન સમાચાર / લોકેશ ચંદ્ર દુબે / રામાનુજ શર્મા

હિન્દુસ્થાન સમાચાર / ડો.હિતેશ એન.વ્યાસ