જમ્મુ, નવી દિલ્હી, 16 જુલાઈ (હિ.સ.) કડક સુરક્ષા વચ્ચે 5,000 થી વધુ શ્રદ્ધાળુઓનો પંદરમો જથ્થો ગુરુવારે જમ્મુથી કાશ્મીરમાં વાર્ષિક અમરનાથ યાત્રાના બે બેઝ કેમ્પ માટે રવાના થયો. અત્યાર સુધીમાં 3,880 મીટર ઊંચા ગુફા મંદિરમાં 3.25 લાખથી વધુ યાત્રાળુઓ પૂજા-અર્ચના કરી ચૂક્યા છે.

અધિકારીઓએ જણાવ્યું કે, યાત્રાળુઓના આ નવા જથ્થા (5,201 લોકો) માં 92 સાધુ, નવ સાધ્વીઓ, 3,970 પુરુષો, 1,124 મહિલાઓ, 5 બાળકો અને એક ટ્રાન્સજેન્ડરનો સમાવેશ થતો હતો. તેઓ સીઆરપીએફ અને પોલીસની સુરક્ષામાં 251 વાહનોના કાફલામાં રવાના થયા. આ કાફલો બે અલગ-અલગ જૂથોમાં રવાના થયો. બાલતાલ જનારા કાફલામાં 74 વાહનોમાં 1,745 યાત્રાળુઓ હતા, જે સવારે 3 વાગ્યે રવાના થયો. પહેલગામ જનારા કાફલામાં 177 વાહનોમાં 3,456 યાત્રાળુઓ હતા, જે સવારે 3:30 વાગ્યે રવાના થયો.

ગુરુવારે રવાના થયેલા જથ્થા સાથે 2 જુલાઈએ યાત્રા શરૂ થયા પછી અત્યાર સુધીમાં કુલ 1,04,488 યાત્રાળુઓ જમ્મુ બેઝ કેમ્પથી કાશ્મીર માટે રવાના થઈ ચૂક્યા છે. યાત્રા માટે નીકળતી વખતે શ્રદ્ધાળુઓના 'બમ બમ ભોલે', 'હર હર મહાદેવ' અને 'જય બરફાની બાબા કી' ના જયઘોષથી ભગવતી નગર બેઝ કેમ્પ ગુંજી ઉઠ્યો. ઘણા યાત્રાળુઓએ યાત્રાના સુચારુ સંચાલન માટે કરવામાં આવેલી વ્યવસ્થા પર સંતોષ વ્યક્ત કર્યો. પવિત્ર ગુફા મંદિરની 57 દિવસની વાર્ષિક તીર્થયાત્રા 28 ઓગસ્ટે સંપન્ન થવાની છે.

હિન્દુસ્થાન સમાચાર / રાધા પંડિતા / સુનીત નિગમ

હિન્દુસ્થાન સમાચાર / માધવી વ્યાસ