નવી દિલ્હી, 16 જુલાઈ (હિ.સ.) રાષ્ટ્રપતિ દ્રૌપદી મુર્મુ, ઉપરાષ્ટ્રપતિ સીપી રાધાકૃષ્ણન અને લોકસભા અધ્યક્ષ ઓમ બિરલા સહિત અનેક નેતાઓએ ભગવાન જગન્નાથની પવિત્ર રથયાત્રાના અવસરે દેશવાસીઓને હાર્દિક શુભેચ્છાઓ પાઠવી.

રાષ્ટ્રપતિ મુર્મુએ આજે એક્સ પર લખ્યું, ''મહાપ્રભુની રથયાત્રાના આ પાવન અવસરે, હું દેશ-વિદેશમાં રહેતા શ્રી જગન્નાથના તમામ ભક્તોને હાર્દિક શુભેચ્છાઓ પાઠવું છું. એવી માન્યતા છે કે, આ પવિત્ર શોભાયાત્રાની મહાન પરંપરા દરમિયાન, મહાપ્રભુ શ્રી જગન્નાથ, ચક્રરાજ સુદર્શન, મોટા ભાઈ બલભદ્ર અને બહેન સુભદ્રા સાથે ભક્તોને મળે છે. ભક્તો અને પ્રભુના મિલનનો આ ભાવપૂર્ણ ક્ષણ અદ્વિતીય છે. મારી પ્રાર્થના છે કે, મહાપ્રભુ શ્રી જગન્નાથની કૃપાથી આપણા દેશ અને અહીંના લોકોની સુખ-સમૃદ્ધિમાં નિરંતર વૃદ્ધિ થાય. જય જગન્નાથ!''

ઉપરાષ્ટ્રપતિએ કહ્યું કે, પવિત્ર રથયાત્રા આસ્થા, ભક્તિ, સમાનતા અને પરસ્પર સદ્ભાવના મૂલ્યોને દર્શાવે છે અને તમામ મતભેદોથી ઉપર ઉઠીને લોકોને એકસાથે લાવે છે. આ આપણી સમૃદ્ધ સાંસ્કૃતિક વિરાસત અને સ્થાયી આધ્યાત્મિક પરંપરાઓનો એક જીવંત ઉત્સવ છે. મહાપ્રભુ જગન્નાથના દિવ્ય આશીર્વાદ આપણને સત્ય અને ધર્મના માર્ગે ચાલવા માટે પ્રેરિત કરે, આપણા સામૂહિક સંકલ્પને મજબૂત કરે અને સમગ્ર દેશમાં શાંતિ અને એકતાને પ્રોત્સાહન આપે.

ઓમ બિરલાએ કહ્યું કે, ભગવાન શ્રી જગન્નાથની રથયાત્રા ભારતીય સંસ્કૃતિની તે શાશ્વત ચેતનાનો એક દિવ્ય ઉત્સવ છે, જ્યાં આસ્થા, આધ્યાત્મિકતા અને જન-કલ્યાણનો અદ્ભુત સંગમ સાકાર રૂપ લે છે. આ ફક્ત ભક્તિ અને શ્રદ્ધાનો ભવ્ય ઉત્સવ જ નથી, પરંતુ આપણી સનાતન સાંસ્કૃતિક પરંપરાનું જીવંત પ્રતીક પણ છે, જેણે યુગો-યુગોથી લોકોના હૃદયમાં આસ્થા, સદ્ભાવ, સેવા અને આધ્યાત્મિક ચેતનાનો સંચાર કર્યો છે. આ મહાન પરંપરા આપણને યાદ અપાવે છે કે જીવનનો સાર ધર્મ, કર્તવ્ય, નમ્રતા અને સમર્પણના પથ પર નિરંતર આગળ વધવામાં રહેલો છે, અને સાચી સાધના સમાજ અને રાષ્ટ્રના વ્યાપક કલ્યાણ માટે પોતાને સમર્પિત કરવી છે.

કેન્દ્રીય ગૃહ અને સહકારિતા મંત્રી અમિત શાહે કહ્યું કે, વિશ્વ-પ્રસિદ્ધ જગન્નાથ રથયાત્રા અતૂટ આસ્થા, વિશ્વાસ અને ભક્તિનું પ્રતીક છે. હું ભગવાન જગન્નાથજીથી સૌની ખુશી, સમૃદ્ધિ અને કલ્યાણ માટે પ્રાર્થના કરું છું. કેન્દ્રીય માર્ગ પરિવહન અને રાજમાર્ગ મંત્રી નીતિન ગડકરીએ કહ્યું કે રથયાત્રાનો આ પવિત્ર પર્વ સૌના જીવનમાં શાંતિ, સમૃદ્ધિ અને ખુશીઓ લાવે.

રક્ષા મંત્રી રાજનાથ સિંહે કહ્યું કે, ભગવાન શ્રી જગન્નાથજીની કૃપા તમારા જીવનમાં ખુશીઓ, શાંતિ, સમૃદ્ધિ અને સકારાત્મક ઊર્જાનો સંચાર કરે. જય જગન્નાથ!

કેન્દ્રીય સંસ્કૃતિ અને પર્યટન મંત્રી ગજેન્દ્ર સિંહ શેખાવતે કહ્યું કે, રથયાત્રા ભારતની સનાતન સંસ્કૃતિ, લોક પરંપરાઓ અને સામાજિક સદ્ભાવની જીવંતતાને સ્પષ્ટપણે પ્રગટ કરે છે. ભગવાન જગન્નાથ, બલભદ્રજી અને માતા સુભદ્રાની કૃપા સૌના જીવનમાં સુખ, સમૃદ્ધિ અને શુભતા લાવે અને આપણી સાંસ્કૃતિક વિરાસત સદૈવ સમૃદ્ધ અને અક્ષુણ્ણ રહે.

કેન્દ્રીય કાપડ મંત્રી ગિરિરાજ સિંહે કહ્યું કે, ભગવાન જગન્નાથ, તેમના ભ્રાતા બલભદ્ર અને દેવી સુભદ્રાજીના રથોની આ દિવ્ય શોભાયાત્રા સમગ્ર દેશમાં સુખ, શાંતિ, સમૃદ્ધિ અને સદ્ભાવનો સંચાર કરે, એ જ મંગલકામના છે.

હિન્દુસ્થાન સમાચાર / શ્રદ્ધા દ્વિવેદી / મુકુંદ

હિન્દુસ્થાન સમાચાર / ડો.હિતેશ એન.વ્યાસ