નવી દિલ્હી, 21 જુલાઈ (હિ.સ.) આમિર ખાન, આર. માધવન અને શરમન જોશી અભિનીત સુપરહિટ ફિલ્મ '3 ઇડિયટ્સ' ફરી એકવાર સિનેમાઘરોમાં પાછી ફરવા માટે તૈયાર છે. વર્ષ 2009માં રિલીઝ થયેલી આ ફિલ્મ લગભગ 17 વર્ષ પછી ફરી મોટા પડદા પર દર્શકોનું મનોરંજન કરશે. આમિર ખાનના 60મા જન્મદિવસના અવસરે તેમની ઘણી ફિલ્મોને રી-રિલીઝ કરવામાં આવી હતી, પરંતુ '3 ઇડિયટ્સ' તે યાદીમાં સામેલ નહોતી. હવે ફિલ્મના પ્રશંસકોને તેને ફરી એકવાર સિનેમાઘરોમાં જોવાનો મોકો મળશે.

રિપોર્ટ અનુસાર, શિક્ષક દિવસના અવસરે '3 ઇડિયટ્સ'ને 4 સપ્ટેમ્બર 2026ના રોજ દેશભરના સિનેમાઘરોમાં ફરીથી રિલીઝ કરવામાં આવશે. જણાવવામાં આવી રહ્યું છે કે એનએચ સ્ટુડિયોઝ પોતાની રી-રિલીઝ રણનીતિ હેઠળ આ પ્રતિષ્ઠિત ફિલ્મને ફરીથી મોટા પડદા પર લાવી રહ્યું છે, જેથી નવી પેઢીના દર્શકો પણ તેને સિનેમાઘરોમાં જોવાનો અનુભવ લઈ શકે, જ્યારે જૂના પ્રશંસકો પોતાની યાદો તાજી કરી શકે.

રાજકુમાર હિરાણીના નિર્દેશનમાં બનેલી '3 ઇડિયટ્સ' ભારતીય સિનેમાની સૌથી લોકપ્રિય અને સફળ ફિલ્મોમાંની એક ગણાય છે. ચેતન ભગતની નવલકથા ફાઇવ પોઇન્ટ સમવનથી પ્રેરિત આ ફિલ્મમાં આમિર ખાને 'રૅન્ચો' ઉર્ફે 'ફુનસુખ વાંગડુ'નો યાદગાર કિરદાર નિભાવ્યો હતો. શિક્ષણ વ્યવસ્થા, દોસ્તી અને જિંદગીને નવા દૃષ્ટિકોણથી રજૂ કરતી આ ફિલ્મે બોક્સ ઓફિસ પર શાનદાર સફળતા મેળવી હતી અને આજે પણ દર્શકોમાં તેની લોકપ્રિયતા યથાવત છે.

હિન્દુસ્થાન સમાચાર / લોકેશ ચંદ્ર દુબે / રામાનુજ શર્મા

હિન્દુસ્થાન સમાચાર / ડો.હિતેશ એન.વ્યાસ