બ્યુનસ આયર્સ, નવી દિલ્હી, 24 જુલાઈ (હિ.સ.). આર્જેન્ટિનાના અનુભવી ડિફેન્ડર નિકોલસ ઓટામોન્ડીએ, ગુરુવારે આંતરરાષ્ટ્રીય ફૂટબોલમાંથી નિવૃત્તિની જાહેરાત કરી દીધી. આ સાથે જ 38 વર્ષીય ખેલાડીની 17 વર્ષ લાંબી શાનદાર આંતરરાષ્ટ્રીય કારકિર્દીનો અંત આવ્યો. આ દરમિયાન તેમણે આર્જેન્ટિનાને 2022 ફીફા વિશ્વ કપ અને બે કોપા અમેરિકા ખિતાબ જીતાડવામાં મહત્વપૂર્ણ ભૂમિકા ભજવી.

ઓટામોન્ડીએ આર્જેન્ટિના માટે 139 આંતરરાષ્ટ્રીય મેચ રમી અને ચાર ફીફા વિશ્વ કપમાં દેશનું પ્રતિનિધિત્વ કર્યું. તેઓ તાજેતરમાં અમેરિકામાં આયોજિત ફીફા વિશ્વ કપ 2026માં ઉપવિજેતા રહેલી આર્જેન્ટિના ટીમનો પણ ભાગ હતા. ફાઇનલમાં આર્જેન્ટિનાને સ્પેન સામે વધારાના સમયમાં 1-0થી હારનો સામનો કરવો પડ્યો હતો.

નિવૃત્તિની જાહેરાત કરતા ઓટામોન્ડીએ ઇન્સ્ટાગ્રામ પર ભાવુક સંદેશ શેર કર્યો. તેમણે લખ્યું, આજે મારે મારી કારકિર્દીના સૌથી મુશ્કેલ શબ્દો લખવા પડી રહ્યા છે. કિસ્મતે એવું લખ્યું કે મારી છેલ્લી મેચ વિશ્વ કપ ફાઇનલ રહી. પરિણામ અમારી અપેક્ષા મુજબ ન રહ્યું, પરંતુ હું ગર્વ સાથે વિદાય લઈ રહ્યો છું કારણ કે આ ટીમે છેલ્લી સેકન્ડ સુધી પોતાનું સર્વશ્રેષ્ઠ પ્રદર્શન કર્યું. આર્જેન્ટિના, મને વિશ્વ ચેમ્પિયન બનવાનું સ્વપ્ન પૂરું કરવાની તક આપવા બદલ આભાર.

તાજેતરમાં ઓટામોન્ડીએ યુરોપમાં 16 વર્ષની સફળ કારકિર્દી સમાપ્ત કર્યા પછી આર્જેન્ટિનાના દિગ્ગજ ક્લબ રિવર પ્લેટ સાથે જોડાવાનો નિર્ણય કર્યો. યુરોપમાં તેમણે પોર્ટો, વેલેન્સિયા, માન્ચેસ્ટર સિટી અને બેનફિકા જેવા મોટા ક્લબોનું પ્રતિનિધિત્વ કર્યું અને ઘણી યાદગાર સફળતાઓ હાંસલ કરી.

પોતાની મજબૂત રક્ષણાત્મક રમત, નેતૃત્વ ક્ષમતા અને જુઝારુ અંદાજ માટે જાણીતા ઓટામોન્ડીને આર્જેન્ટિના ફૂટબોલના સૌથી સફળ ડિફેન્ડરોમાં ગણવામાં આવે છે. તેમની નિવૃત્તિ સાથે આર્જેન્ટિના ફૂટબોલના એક સુવર્ણ અધ્યાયનો પણ સમાપ્તિ થઈ.

હિન્દુસ્થાન સમાચાર / સુનીલ દુબે

હિન્દુસ્થાન સમાચાર / ડો.હિતેશ એન.વ્યાસ