નવી દિલ્હી, 26 જુલાઈ (હિ.સ.). વડાપ્રધાન નરેન્દ્ર મોદીએ, રવિવારે 'મન કી બાત' કાર્યક્રમમાં ભારતની તાજેતરની રમતગમત સિદ્ધિઓની પ્રશંસા કરતા, બેડમિન્ટન સ્ટાર પીવી સિંધુની જાપાન ઓપનમાં ઐતિહાસિક જીત અને ભારતીય મહિલા ક્રિકેટ ટીમની લોર્ડ્સમાં નોંધાવેલી ઐતિહાસિક ટેસ્ટ વિજયને દેશ માટે ગર્વની ક્ષણ ગણાવી.

વડાપ્રધાન મોદીએ 'મન કી બાત' કાર્યક્રમના 136મા એપિસોડમાં કહ્યું કે, આપણા યુવાનોએ તાજેતરના દિવસોમાં રમતોમાં ઘણી નોંધપાત્ર સિદ્ધિઓ હાંસલ કરી છે. પીવી સિંધુ બેડમિન્ટનમાં જાપાન ઓપનનો ખિતાબ જીતનારી પ્રથમ ભારતીય બન્યા છે. આખો દેશ તેમની આ સિદ્ધિ પર ગર્વ અનુભવે છે.

સિંધુએ તાજેતરમાં બીડબ્લ્યુએફ જાપાન ઓપન સુપર-750ના મહિલા સિંગલ્સ ફાઇનલમાં જાપાનની અકાને યામાગુચીને 21-17, 21-17 થી હરાવીને ખિતાબ પોતાના નામે કર્યો હતો. આ સાથે જ તેઓ જાપાન ઓપન ખિતાબ જીતનારા પ્રથમ ભારતીય શટલર પણ બન્યા. તેમણે પોતાની કારકિર્દીનો પ્રથમ સુપર-750 ખિતાબ જીત્યો.

વડાપ્રધાન મોદીએ ભારતીય મહિલા ક્રિકેટ ટીમની ઐતિહાસિક સિદ્ધિનો પણ વિશેષ ઉલ્લેખ કર્યો. તેમણે કહ્યું કે, ભારતીય મહિલા ક્રિકેટ ટીમે પણ લંડનના લોર્ડ્સ સ્ટેડિયમમાં ટેસ્ટ મેચ જીતી છે. આ એક ઐતિહાસિક જીત છે. આપણી ટીમે 270 રનના મોટા અંતરથી આ મુકાબલો જીત્યો છે, પરંતુ વાત ફક્ત આટલી જ નથી. લોર્ડ્સના લાંબા ઇતિહાસમાં આ મહિલાઓની પ્રથમ ટેસ્ટ મેચ હતી. 1983માં આ જ મેદાન પર ભારતે પોતાનો પ્રથમ ક્રિકેટ વર્લ્ડ કપ જીત્યો હતો. હવે આપણી નારી શક્તિએ પણ અહીં દેશનું નામ રોશન કર્યું છે.

ભારતે આ મહિનાની શરૂઆતમાં લોર્ડ્સમાં રમાયેલી એકમાત્ર મહિલા ટેસ્ટ મેચમાં ઇંગ્લેન્ડને 270 રનથી હરાવીને ઇતિહાસ રચ્યો હતો. ભારતીય ટીમે બેટિંગ, બોલિંગ અને ફિલ્ડિંગ ત્રણેય વિભાગોમાં શાનદાર પ્રદર્શન કર્યું હતું.

હિન્દુસ્થાન સમાચાર / વીરેન્દ્ર સિંહ / સંજીવ પાશ

હિન્દુસ્થાન સમાચાર / માધવી વ્યાસ