- વિદ્યાર્થીઓની જરૂરીયાત પ્રમાણે સમય અનુકૂળ કરવા સુચન સાથે વ્યવસ્થાની સમીક્ષા કરવામાં આવી

ગાંધીનગર, 03 જુલાઈ (હિ.સ.) : આજનો વિદ્યાર્થી આવતીકાલનો શ્રેષ્ઠ નાગરિક બને તેવા ઉદાત્ત અભિગમ સાથે સરકાર દ્વારા શિક્ષણ અને વાંચન પર વિશેષ ભાર મૂકવામાં આવી રહ્યો છે. ગ્રામ્ય અને શહેરી વિસ્તારના વિદ્યાર્થીઓને વાંચન માટે યોગ્ય વાતાવરણ મળી રહે તે હેતુથી તૈયાર કરાયેલી લાઇબ્રેરીઓનો સર્વશ્રેષ્ઠ ઉપયોગ થાય અને તે ભવિષ્યમાં રોજગારી તેમજ જ્ઞાનવર્ધનમાં ઉપયોગી નીવડે તે માટે વહીવટી તંત્ર સતત કાર્યરત છે.

આ જ હેતુસર ગાંધીનગર જિલ્લા કલેક્ટર રવિન્દ્ર ખતાલે દ્વારા વડસર ખાતે આવેલી લાઇબ્રેરીની આકસ્મિક મુલાકાત લેવામાં આવી હતી અને ત્યાં ઉપલબ્ધ સુવિધાઓ તેમજ તેની ઉપયોગિતાની ઝીણવટભરી ચકાસણી કરવામાં આવી હતી.

વડસર લાઇબ્રેરીની મુલાકાત દરમિયાન કલેક્ટર એ ત્યાં વાંચન અર્થે આવતા વિદ્યાર્થીઓને સમયની અનુકૂળતા કરી આપવા તેમજ ડિજિટલ અને ભૌતિક સુવિધાઓ અંગે સંબંધિત અધિકારીઓને જરૂરી સૂચનો કર્યા હતા. વિદ્યાર્થીઓને વાંચવામાં કોઈ પણ પ્રકારની અગવડ ન પડે અને તેમના માટે જરૂરી તમામ મૂળભૂત સુવિધાઓ જળવાઈ રહે તે માટે તેમણે ખાસ તાકેદારી લેવા સુચન કરતાં જણાવ્યું હતું કે,

આપણા જિલ્લાના વધુમાં વધુ વિદ્યાર્થીઓ લાઇબ્રેરીનો મહત્તમ ઉપયોગ કરતા થાય અને તેમના જ્ઞાનમાં ઉત્તરોત્તર વધારો થાય તે જ આપણો મૂળ હેતુ છે.

સરકારના આ પ્રશંસનીય પ્રયાસો અને કલેક્ટરની આ સરાહનીય પહેલથી સ્થાનિક વિદ્યાર્થીઓમાં ખુશીનો માહોલ જોવા મળ્યો છે. આગામી સમયમાં પણ જિલ્લાની અન્ય લાઇબ્રેરીઓમાં સુવિધાઓ વધુ સુદ્રઢ બને તે દિશામાં વહીવટી તંત્ર દ્વારા આજ પ્રમાણે મોનિટરિંગ રાખવામાં આવશે.

---------------

હિન્દુસ્થાન સમાચાર / અભિષેક બારડ