કચ્છ, 03 જુલાઈ (હિ.સ.) : કચ્છના નલિયા-કોઠારા હાઇવે પર શુક્રવારે ભાનાળા ગામ નજીક એક ગંભીર માર્ગ અકસ્માત સર્જાતા સમગ્ર વિસ્તારમાં દોડધામ મચી ગઈ હતી. ઓઈલથી ભરેલા બે બલ્ક ટેન્કર સામસામે ધડાકાભેર અથડાતા પળવારમાં બંને વાહનો આગની જ્વાળાઓમાં સપડાઈ ગયા હતા. અકસ્માત બાદ દૂર સુધી કાળા ધુમાડાના ગોટેગોટા આકાશમાં છવાઈ જતાં આસપાસના લોકોમાં ભયનો માહોલ સર્જાયો હતો.

અકસ્માતની તીવ્રતા એટલી ગંભીર હતી કે અથડામણ બાદ બંને ટેન્કરમાં રહેલું જ્વલનશીલ ઓઈલ સળગી ઊઠતાં આગે વિકરાળ સ્વરૂપ ધારણ કર્યું હતું. ઘટનાની જાણ થતાં પોલીસ તેમજ ફાયર બ્રિગેડની ટીમો તાત્કાલિક સ્થળ પર પહોંચી આગ પર કાબૂ મેળવવા માટે કામગીરીમાં લાગી ગઈ હતી. આગને કારણે હાઇવે પર લાંબા સમય સુધી વાહનવ્યવહાર ખોરવાઈ ગયો હતો અને સુરક્ષાના ભાગરૂપે બંને તરફથી ટ્રાફિક અટકાવવામાં આવ્યો હતો.

પ્રાથમિક માહિતી અનુસાર અકસ્માતમાં સામેલ બંને બલ્ક ટેન્કર ઓઈલ ભરેલા હતા. જોકે, સદનસીબે અત્યાર સુધી કોઈ જાનહાનિના અહેવાલ સામે આવ્યા નથી. સમયસર રાહત અને બચાવ કામગીરી શરૂ થતાં મોટી દુર્ઘટના ટળી હોવાનું માનવામાં આવે છે.

અકસ્માત કેવી રીતે સર્જાયો તે અંગે હજી સ્પષ્ટ માહિતી સામે આવી નથી. પોલીસે સમગ્ર ઘટનાની નોંધ લઈ અકસ્માતના ચોક્કસ કારણો જાણવા તપાસ શરૂ કરી છે. આગ સંપૂર્ણપણે કાબૂમાં આવ્યા બાદ જ અકસ્માતની હકીકત અને નુકસાનનું સાચું ચિત્ર સ્પષ્ટ થઈ શકશે.

આ ઘટનાએ નલિયા-કોઠારા હાઇવે પર પસાર થતા વાહનચાલકોમાં ચિંતાનો માહોલ ઉભો કર્યો છે. સ્થાનિક લોકોના જણાવ્યા મુજબ અકસ્માત બાદ સર્જાયેલા આગના ભયાનક દૃશ્યો લાંબા સમય સુધી યાદ રહી જાય એવા હતા. પોલીસે વાહનચાલકોને સાવચેતીપૂર્વક મુસાફરી કરવાની અપીલ કરી છે.

---------------

હિન્દુસ્થાન સમાચાર / Rohit Ramjibhai Padhiyar