ભાવનગર, 04 જુલાઈ (હિ.સ.)ભાવનગર જિલ્લાના મહુવા તાલુકામાં સીઝનના પ્રથમ જ નોંધપાત્ર વરસાદે જનજીવનને અસર પહોંચાડી છે. બપોર બાદ અચાનક વાતાવરણમાં પલટો આવતા ગાજવીજ સાથે ધોધમાર વરસાદ વરસ્યો હતો. ભારે વરસાદને કારણે મહુવા તાલુકાના તલગાજરડા ગામના અનેક વિસ્તારોમાં ગોઠણસમા પાણી ભરાઈ જતાં ગામ જળબંબાકાર બન્યું હતું.

સતત વરસેલા વરસાદના કારણે ગામના મુખ્ય માર્ગો, શેરીઓ અને નીચાણવાળા વિસ્તારો પાણીમાં ગરકાવ થઈ ગયા હતા. રસ્તાઓ પર પાણી ફરી વળતાં વાહનચાલકોને ભારે હાલાકીનો સામનો કરવો પડ્યો હતો. દ્વિચક્રી વાહનચાલકોને ખાસ કરીને મુશ્કેલી પડી હતી, જ્યારે અનેક સ્થળોએ લોકો પાણીમાંથી પસાર થઈ પોતાના ગંતવ્ય સુધી પહોંચતા જોવા મળ્યા હતા.

વરસાદને કારણે થોડા સમય માટે ગામની જનજીવનની ગતિ પણ ધીમી પડી ગઈ હતી. વેપારીઓએ દુકાનોની બહાર ભરાયેલા પાણી દૂર કરવાની કામગીરી હાથ ધરી હતી, જ્યારે સ્થાનિકોએ પણ સાવચેતી રાખીને જરૂરી કામકાજ પૂરું કર્યું હતું. વરસાદના કારણે ખેડૂતોમાં ખુશીનો માહોલ જોવા મળ્યો છે, કારણ કે ચોમાસાની સારી શરૂઆતથી ખેતી માટે અનુકૂળ વાતાવરણ સર્જાયું છે.

હવામાનમાં આવેલા આ અચાનક ફેરફારને કારણે સમગ્ર વિસ્તારમાં ઠંડક પ્રસરી ગઈ હતી અને લોકોને ગરમીમાંથી રાહત મળી હતી. જોકે, પાણી ભરાવાના કારણે સ્થાનિકોને દૈનિક અવરજવરમાં મુશ્કેલીઓનો સામનો કરવો પડ્યો હતો. જો આગામી દિવસોમાં પણ ભારે વરસાદ ચાલુ રહેશે તો નીચાણવાળા વિસ્તારોમાં વધુ પાણી ભરાવાની શક્યતા વ્યક્ત કરવામાં આવી રહી છે. સ્થાનિક તંત્ર પણ પરિસ્થિતિ પર નજર રાખી રહ્યું છે અને જરૂરી તકેદારીના પગલાં લેવા માટે સતર્ક બન્યું છે.

---------------

હિન્દુસ્થાન સમાચાર / DISHANT NANDRAMBHAI GONADLIYA