ભાવનગર, 05 જુલાઈ (હિ.સ.)ભાવનગર જિલ્લામાં છેલ્લા કેટલાક સમયથી સતત વરસાદ વરસી રહ્યો છે. ભારે વરસાદના કારણે મહુવા શહેરના અનેક નીચાણવાળા વિસ્તારોમાં વરસાદી પાણી ભરાઈ જતાં સ્થાનિક રહેવાસીઓને મુશ્કેલીઓનો સામનો કરવો પડી રહ્યો છે. રસ્તાઓ પર પાણી ભરાવાના કારણે વાહનવ્યવહાર પણ પ્રભાવિત થયો હતો અને કેટલાક વિસ્તારોમાં લોકોને અવરજવર કરવામાં મુશ્કેલી પડી હતી.

આ પરિસ્થિતિને ધ્યાનમાં રાખીને મહુવા નગરપાલિકાના ચીફ ઓફિસરે શહેરના પાણી ભરાયેલા વિસ્તારોની સ્થળ મુલાકાત લીધી હતી. તેમણે વિવિધ વિસ્તારોમાં જઈને વરસાદી પાણી ભરાવાની સ્થિતિનું નિરીક્ષણ કર્યું અને નગરપાલિકાના અધિકારીઓ તેમજ કર્મચારીઓને તાત્કાલિક પાણીના નિકાલ માટે જરૂરી કામગીરી હાથ ધરવા સૂચના આપી હતી.

ચીફ ઓફિસરે જણાવ્યું હતું કે જ્યાં વરસાદી પાણીનો ભરાવો વધુ છે ત્યાં પમ્પિંગ મશીન સહિતના જરૂરી સાધનોનો ઉપયોગ કરીને ઝડપથી પાણીનો નિકાલ કરવામાં આવે. સાથે જ વરસાદી ગટર અને ડ્રેનેજ લાઈનોમાં કોઈ અવરોધ હોય તો તેને પણ તાત્કાલિક દૂર કરવા માટે સંબંધિત ટીમોને કામગીરી સોંપવામાં આવી છે.

નગરપાલિકાની ટીમો વરસાદી માહોલ વચ્ચે સતત મેદાનમાં રહી કામગીરી કરી રહી છે, જેથી નાગરિકોને ઓછામાં ઓછી મુશ્કેલીનો સામનો કરવો પડે. વરસાદની સ્થિતિને ધ્યાનમાં રાખીને વિવિધ વિસ્તારો પર સતત નજર રાખવામાં આવી રહી છે અને જરૂરિયાત મુજબ તાત્કાલિક કાર્યવાહી કરવામાં આવી રહી છે.

નગરપાલિકા દ્વારા નાગરિકોને પણ અપીલ કરવામાં આવી છે કે ભારે વરસાદ દરમિયાન બિનજરૂરી બહાર નીકળવાનું ટાળવું, પાણી ભરાયેલા રસ્તાઓ પરથી સાવચેતીપૂર્વક પસાર થવું તેમજ કોઈપણ પ્રકારની સમસ્યા સર્જાય તો તાત્કાલિક નગરપાલિકાના નિયંત્રણ કક્ષાનો સંપર્ક કરવો. આગામી દિવસોમાં પણ વરસાદની સંભાવના હોવાથી તંત્ર સંપૂર્ણ સતર્ક રહી કામગીરી કરી રહ્યું છે.

---------------

હિન્દુસ્થાન સમાચાર / DISHANT NANDRAMBHAI GONADLIYA