મહેસાણા, 06 જુલાઈ (હિ.સ.) : મહેસાણા જિલ્લાના જિલ્લા ક્ષય કેન્દ્ર ખાતે આજે વૃક્ષારોપણ કાર્યક્રમનું આયોજન કરવામાં આવ્યું હતું. એક વૃક્ષ – અનેક જીવન ના સંદેશ સાથે યોજાયેલા આ કાર્યક્રમમાં અધિકારીઓ અને કર્મચારીઓએ ઉત્સાહપૂર્વક વૃક્ષોનું રોપણ કરી પર્યાવરણના સંરક્ષણ માટે પોતાની પ્રતિબદ્ધતા વ્યક્ત કરી હતી.

કાર્યક્રમ દરમિયાન ઉપસ્થિત અધિકારીઓએ જણાવ્યું હતું કે વૃક્ષો માત્ર પર્યાવરણનું સંતુલન જાળવવામાં જ નહીં, પરંતુ સ્વચ્છ હવા, વરસાદનું સંતુલન અને જૈવવિવિધતાના સંરક્ષણમાં પણ મહત્વની ભૂમિકા ભજવે છે. વધતા પ્રદૂષણ અને આબોહવા પરિવર્તનના પડકારોને ધ્યાનમાં રાખીને દરેક વ્યક્તિએ ઓછામાં ઓછું એક વૃક્ષ વાવી તેનું જતન કરવાની જવાબદારી નિભાવવી જોઈએ.

આ પ્રસંગે અધિકારીઓ અને કર્મચારીઓએ વૃક્ષારોપણની સાથે વૃક્ષોના સંરક્ષણનો પણ સંકલ્પ લીધો હતો. તેમણે પર્યાવરણ પ્રત્યે લોકોમાં જાગૃતિ ફેલાવવા અને વધુમાં વધુ વૃક્ષો વાવવા અપીલ કરી હતી. કાર્યક્રમ દરમિયાન વિવિધ જાતના રોપાઓનું વાવેતર કરવામાં આવ્યું હતું.

જિલ્લા ક્ષય કેન્દ્ર દ્વારા આયોજિત આ કાર્યક્રમનો હેતુ હરિયાળું અને સ્વચ્છ પર્યાવરણ નિર્માણની દિશામાં સમાજમાં સકારાત્મક સંદેશ પહોંચાડવાનો હતો. કાર્યક્રમમાં કેન્દ્રના અધિકારીઓ, કર્મચારીઓ તથા અન્ય ઉપસ્થિતોએ સક્રિય ભાગ લીધો હતો.

---------------

હિન્દુસ્થાન સમાચાર / RINKU AMITKUMAR THAKOR