નવી દિલ્હી, 13 ઑગસ્ટ (હિ.સ.) સરકારે આજે આક્ષેપ કર્યો કે, દેશના લોકતાંત્રિક ઇતિહાસમાં આવું પહેલી વાર બન્યું છે કે, વિપક્ષ સંસદમાં ચર્ચા કરવાથી દૂર ભાગતો રહ્યો, જ્યારે સરકાર વારંવાર વિપક્ષને ચર્ચામાં ભાગ લેવા માટે આહ્વાન કરતી રહી.

સંસદના ચોમાસુ સત્રના સમાપન બાદ સંસદીય કાર્ય મંત્રી કિરણ રિજિજુએ મીડિયાને સંબોધતા કહ્યું કે, ચોમાસુ સત્ર પરિણામોની દૃષ્ટિએ સારું રહ્યું, જેમાં 12 વિધેયકો પસાર થયા, પરંતુ ચર્ચાની દૃષ્ટિએ સારું રહ્યું નથી. લોકસભાની કાર્યવાહીનું કુલ ઉત્પાદન 19 ટકા રહ્યું, જ્યારે રાજ્યસભાનું ઉત્પાદન 39 ટકા રહ્યું.

પત્રકાર પરિષદમાં બંને સંસદીય કાર્ય રાજ્ય મંત્રી, અર્જુનરામ મેઘવાલ અને એલ. મુરુગન, સંસદીય કાર્ય સચિવ નિકુંજ ધર તથા વધારાના સચિવ સત્ય પ્રકાશ પણ ઉપસ્થિત હતા.

રિજિજુએ કહ્યું કે, ચર્ચાની દૃષ્ટિએ અમે ખુશ નથી. તેમણે કહ્યું કે, તેમને સંસદીય જીવનનો 30 વર્ષનો અનુભવ થઈ ગયો છે, પરંતુ આ વખતે એવી એક વાત જોવા મળી છે જે પહેલાં ક્યારેય જોઈ કે સાંભળી નહોતી. પહેલી વાર એવું જોવા મળ્યું કે વિપક્ષ ચર્ચાથી દૂર ભાગી રહ્યો હતો. તેમણે કહ્યું કે સંસદીય લોકશાહીમાં વિપક્ષ સરકારને પ્રશ્નો પૂછે છે અને જવાબ માગે છે, પરંતુ અહીં વિપક્ષ ચર્ચાથી દૂર ભાગતો રહ્યો અને સરકાર ચર્ચા કરવા માટે આહ્વાન કરતી રહી. અહીં સુધી કે પ્રશ્નકાળ પણ ચાલવા દીધો નહીં. મંત્રીનો જવાબ સાંભળવા માટે પણ તૈયાર નહોતા.

એક પ્રશ્નના જવાબમાં તેમણે કહ્યું કે, લોકસભામાં માત્ર એક વિધેયક - જાહેર પરીક્ષાઓમાં અનિયમિત માધ્યમોના નિષેધ (સુધારા) વિધેયક -ને છોડીને અન્ય 11 વિધેયકોને વિના ચર્ચાએ પસાર કરાવવામાં આવ્યા, જોકે રાજ્યસભામાં કોંગ્રેસના એક જૂથને છોડીને મોટાભાગના સભ્યોએ ચર્ચામાં ભાગ લીધો.

સંસદીય કાર્ય મંત્રીએ કોંગ્રેસ પર કટાક્ષ કરતાં કહ્યું કે, કોંગ્રેસના ઘણા સાંસદો હવે વિચારવા લાગ્યા છે કે તેમનું કામ હવે માત્ર પ્લેકાર્ડ લહેરાવવું અને નારા લગાવવાનું જ રહી ગયું છે. તેમણે કહ્યું, મને કોંગ્રેસના નવા સાંસદો માટે ખરાબ લાગે છે. હું સંવેદનશીલ માણસ છું. કોંગ્રેસના સાંસદોના દુઃખને સમજી શકું છું. તેમણે કહ્યું કે, આશા છે કે સંસદનું શિયાળુ સત્ર કંઈક સારું પસાર થશે.

સંસદીય કાર્ય મંત્રીએ મીડિયાને સંસદીય મુદ્દાઓની સકારાત્મક રિપોર્ટિંગ માટે આભાર વ્યક્ત કર્યો.

હિન્દુસ્થાન સમાચાર / સચિન બુધૌલિયા

હિન્દુસ્થાન સમાચાર / ડો.હિતેશ એન.વ્યાસ