નવી દિલ્હી, 14 ઓગસ્ટ (હિ.સ.) 'વર્ક ફ્રોમ હોમ ટાસ્ક'ના નામે લોકોને છેતરનારા ચીન સાથે સંકળાયેલા સાયબર છેતરપિંડી કરતી ગેંગનો દિલ્હી પોલીસના સાયબર થાણાએ પર્દાફાશ કરીને ચાર આરોપીઓને હરિયાણા અને ઉત્તર પ્રદેશમાંથી ધરપકડ કરી. આમાં બેંક ખાતા ઉપલબ્ધ કરાવનાર, ખાતા સંચાલક, એજન્ટ અને ખાતાધારકનો સમાવેશ થાય છે. દિલ્હી પોલીસે જણાવ્યું કે, આરોપીઓ ચીનમાં બેઠેલા સાયબર ઠગ્સને 'મ્યુલ' બેંક ખાતા ઉપલબ્ધ કરાવતા હતા. છેતરપિંડીની રકમને જુદા જુદા ખાતાઓમાં ફેરવ્યા પછી ક્રિપ્ટોકરન્સીમાં બદલીને તેના સ્ત્રોતને છુપાવવાનો પ્રયાસ કરવામાં આવતો હતો. પોલીસે નવ બેંક પાસબુક, પાંચ સિમ કાર્ડ, છ મોબાઇલ ફોન અને કમિશનનો હિસાબ રાખતું રજિસ્ટર જપ્ત કર્યું છે.

દિલ્હીના દક્ષિણ પશ્ચિમ જિલ્લાના પોલીસ ઉપાયુક્ત અમિત ગોયલે શુક્રવારે જણાવ્યું કે, 17 જુલાઈના રોજ સાયબર થાણામાં છેતરપિંડીનો કેસ નોંધાયો હતો. પીડિતે જણાવ્યું કે, તેને 'ટેલિગ્રામ' દ્વારા 'વર્ક ફ્રોમ હોમ ટાસ્ક' આધારિત નોકરીની ઓફર કરવામાં આવી હતી. આરોપીઓએ ઓનલાઈન કામ પૂરું કરવા માટે પહેલા 'સિક્યોરિટી' રકમ જમા કરાવી. જ્યારે પીડિતે કમાણી કાઢવાનો પ્રયાસ કર્યો ત્યારે જુદા જુદા બહાના બનાવીને તેની પાસેથી વધુ રકમ જમા કરાવવામાં આવી. આ રીતે પીડિતે આરોપીઓની જાળમાં ફસાઈને કુલ 12 લાખ રૂપિયા ગુમાવી દીધા.

કેસની ગંભીરતાને ધ્યાનમાં રાખીને એસઆઈ ચેતન રાણાના નેતૃત્વમાં, હેડ કોન્સ્ટેબલ વિજયપાલ અને હેડ કોન્સ્ટેબલ મનિન્દરની ટીમ બનાવવામાં આવી. ટેકનિકલ તપાસમાં સામે આવ્યું કે છેતરપિંડીમાં ઉપયોગમાં લેવાયેલી 'ટેલિગ્રામ' આઈડીના 'આઈપી એડ્રેસ' ચીનમાં લોકેટ થઈ રહ્યા હતા. 'મની ટ્રેલ'ની તપાસમાં છેતરપિંડીની રકમનો અમુક ભાગ ગગન યાદવના બેંક ખાતામાં પહોંચ્યો, જેની વિગતો ચીનમાં બેઠેલા ઠગ્સ દ્વારા પીડિતને આપવામાં આવી હતી.

ટેકનિકલ સર્વેલન્સના આધારે પોલીસે ગુરુગ્રામમાં સક્રિય ગીતમ સિંહની ધરપકડ કરી. મેરઠ નિવાસી ગીતમ 'બીબીએ' સ્નાતક છે. તેની પાસેથી ત્રણ મોબાઇલ ફોન મળ્યા. પૂછપરછમાં સામે આવ્યું કે, તે ચીનમાં સ્થિત સાયબર ઠગ્સને 'મ્યુલ' બેંક ખાતા ઉપલબ્ધ કરાવતો હતો અને છેતરપિંડીની રકમને ક્રિપ્ટોકરન્સીમાં બદલતો હતો. તેના મોબાઇલ, 'વોટ્સએપ' અને 'ટેલિગ્રામ' ચેટની તપાસમાં ચીનના સાયબર ઠગ્સ સાથે સીધો સંપર્ક પણ મળ્યો. ગીતમે આપેલી માહિતીના આધારે ગાઝિયાબાદથી 21 વર્ષીય ધ્રુવને પકડવામાં આવ્યો. તે ઇટાવાનો રહેવાસી છે અને 'બી.કોમ' સ્નાતક છે. તેની પાસેથી જુદા જુદા ખાતાધારકોની નવ પાસબુક, પાંચ સિમ કાર્ડ, એક મોબાઇલ ફોન અને બેંક ખાતા ઉપલબ્ધ કરાવવાથી મળેલા કમિશનનો રેકોર્ડ રાખતું રજિસ્ટર જપ્ત થયું.

ધ્રુવની પૂછપરછમાં સામે આવ્યું કે, અનુજ શર્માએ, ગગન યાદવનું બેંક ખાતું ખોલાવવામાં મદદ કરી હતી. ખાતા સાથે જોડાયેલું 'સિમ' પણ અનુજના નામે હતું. આ પછી પોલીસે નોઈડાથી 27 વર્ષીય અનુજ શર્માની ધરપકડ કરી. તે પણ ઇટાવાનો રહેવાસી અને 'એમબીએ' સ્નાતક છે. તેના મોબાઇલમાંથી કમિશનની ચુકવણી સંબંધિત વાંધાજનક 'ચેટ' મળી. પોલીસે આ પછી ઇટાવામાં દરોડો પાડીને 26 વર્ષીય ગગન યાદવની ધરપકડ કરી. પૂછપરછમાં તેણે પોતાનું બેંક ખાતું 'સિન્ડિકેટ'ને ઉપલબ્ધ કરાવવાના બદલામાં કમિશન લીધું હોવાનું જણાવ્યું.

તપાસમાં જાણવા મળ્યું કે, ચીનમાં બેઠેલા ઠગ્સ 'ટેલિગ્રામ' દ્વારા લોકોને આકર્ષક 'વર્ક ફ્રોમ હોમ ટાસ્ક'ની લાલચ આપતા હતા. પહેલા 'સિક્યોરિટી' રકમ જમા કરાવવામાં આવતી અને પછી વધુ નફાની લાલચ આપીને સતત રકમ મંગાવવામાં આવતી. આરોપીઓ બેંક ખાતા અને 'સિમ' ઉપલબ્ધ કરાવવા, છેતરપિંડીની રકમને ઘણા ખાતાઓમાં ફેરવવા, કમિશન લેવા તથા રકમને ક્રિપ્ટોકરન્સીમાં બદલવાનું કામ કરતા હતા. પોલીસ હવે ગેંગના અન્ય સાથીઓ, છેતરપિંડીની રકમ અને આંતરરાષ્ટ્રીય નેટવર્ક સાથે સંકળાયેલા લોકોની શોધ કરી રહી છે.

હિન્દુસ્થાન સમાચાર / કુમાર અશ્વની / પવન કુમાર

હિન્દુસ્થાન સમાચાર / ડો.હિતેશ એન.વ્યાસ