દેહરાદૂન, નવી દિલ્હી, 14 ઓગસ્ટ (હિ.સ.). ઉત્તરાખંડના ચમોલી જિલ્લાના માયાપુર-પીપલકોટી વિસ્તારમાં ટી.એચ.ડી.સી.ની નિર્માણાધીન સુરંગમાં કાટમાળ અને પાણી ભરાવાને કારણે થયેલા અકસ્માતમાં અત્યાર સુધીમાં સાત લોકોના મોત થયા છે. બાકીના લોકોને બહાર કાઢવા માટે રાહત અને બચાવ અભિયાન ચાલુ છે. મુખ્યમંત્રી પુષ્કર સિંહ ધામી શુક્રવારે ખૂબ જ ખરાબ હવામાન વચ્ચે પીપલકોટી પહોંચ્યા છે.

જિલ્લા પ્રશાસન અનુસાર, વિષ્ણુગઢ-પીપલકોટી જળ વિદ્યુત પરિયોજનાની ટી.આર.ટી. ટનલમાં ગુરુવારે સાંજે ભૂસ્ખલનને કારણે લગભગ 1.50 કિલોમીટરના ભાગમાં કાટમાળ અને પાણી ભરાઈ ગયું. ટનલની કુલ લંબાઈ લગભગ ત્રણ કિલોમીટર છે. અકસ્માત બાદ ટનલમાં 22 લોકો ફસાયા હોવાની માહિતી મળી હતી.

જિલ્લાધિકારી ગૌરવ કુમાર રાતભર ઘટનાસ્થળે હાજર રહીને બચાવ અભિયાનનું નિરીક્ષણ કરતા રહ્યા. પ્રશાસનના જણાવ્યા અનુસાર, બચાવ અભિયાનમાં અત્યાર સુધી બાકીના લોકોને સુરક્ષિત બહાર કાઢવાના પ્રયાસો ચાલુ છે. રાહત અને બચાવ કાર્યમાં સહયોગ માટે ટનલની અંદર ગયેલા છ બચાવકર્મીઓ પણ સુરક્ષિત છે.

જિલ્લા પ્રશાસન અનુસાર, ઇજાગ્રસ્તોની જિલ્લા ચિકિત્સાલય ગોપેશ્વરમાં સારવાર કરવામાં આવી રહી છે. એન.ડી.આર.એફ., એસ.ડી.આર.એફ., આઈ.ટી.બી.પી., પોલીસ તથા અન્ય તકનીકી અને નિષ્ણાત ટીમો રાહત અને બચાવ અભિયાનમાં લાગી છે. ટનલની અંદર કાટમાળ અને પાણી હોવાને કારણે બચાવ દળને મુશ્કેલ પરિસ્થિતિઓનો સામનો કરવો પડી રહ્યો છે.

જિલ્લાધિકારીએ અધિકારીઓ અને બચાવ દળોને તમામ ઉપલબ્ધ સંસાધનો અને તકનીકી સહાયનો ઉપયોગ કરીને ફસાયેલા લોકોને જલદીથી જલદી સુરક્ષિત બહાર કાઢવાના નિર્દેશ આપ્યા છે. પ્રશાસન દ્વારા કહેવામાં આવ્યું કે, અભિયાનને સર્વોચ્ચ પ્રાથમિકતા સાથે ચાલુ રાખવામાં આવ્યું છે.

મુખ્યમંત્રી પુષ્કર સિંહ ધામી શુક્રવારે ખૂબ જ ખરાબ હવામાન વચ્ચે પીપલકોટી પહોંચ્યા. પ્રતિકૂળ હવામાનને કારણે હેલિકોપ્ટરનું લેન્ડિંગ પણ મુશ્કેલ પરિસ્થિતિઓમાં થયું. મુખ્યમંત્રી અહીં ટી.એચ.ડી.સી.ની નિર્માણાધીન સુરંગમાં ફસાયેલા શ્રમિકોને સુરક્ષિત બહાર કાઢવા માટે ચલાવવામાં આવી રહેલા રાહત અને બચાવ અભિયાનનું સ્થળ નિરીક્ષણ કરશે. તેમણે કહ્યું કે સુરંગમાં ફસાયેલા દરેક શ્રમિકને સુરક્ષિત બહાર કાઢવું રાજ્ય સરકારની સર્વોચ્ચ પ્રાથમિકતા છે. આ માટે તમામ સંબંધિત એજન્સીઓ સંકલન સાથે યુદ્ધના ધોરણે રાહત અને બચાવ અભિયાનમાં લાગી છે.

અકસ્માતમાં મૃતકોની યાદીમાં પ્રદીપ સિંહ પવાર (31), મુકેશ, દુર્લભ શર્મા, વિજય (28), જીતેન્દ્ર કુમાર, લોકેશ્વર અને ભુવનેશ્વરના નામ શામેલ છે. પ્રદીપ સિંહ પવાર ટિહરી જિલ્લાના ચંબા વિસ્તારના ગામ ગેંવાલના નિવાસી હતા. મુકેશ ચમોલી જિલ્લાના ઉર્ગમના રહેવાસી હોવાનું જણાવાયું છે. દુર્લભ શર્મા બિહારના, જ્યારે વિજય અને જીતેન્દ્ર કુમાર ઝારખંડના નિવાસી હતા. લોકેશ્વર અને ભુવનેશ્વરના સંબંધમાં વિસ્તૃત જાણકારી એકત્રિત કરવામાં આવી રહી છે.

જિલ્લા ચિકિત્સાલય ગોપેશ્વરમાં દાખલ કરાયેલા કર્મચારીઓની યાદીમાં સુનીલ દીવાન (20) છત્તીસગઢના, હાબિલ ગુડિયા (27), નિસ્તાર ભિગરા (24), વિનોદ રાવના (46), દીના બૈગરા (26) અને ખેલા રામ બિસરા (22) ઝારખંડના નિવાસી હોવાનું જણાવાયું છે. છબેર સિંહ (45) પંજાબના, તિલક રાજ (48) હિમાચલ પ્રદેશના, ચંદન કુમાર (39), અવધેશ, નંદલાલ અને રોહિત પાંડે (20) બિહારના તથા પેન સિંહ (33) છત્તીસગઢના નિવાસી છે. રોહિત પાંડેને શ્રીનગર રિફર કરવામાં આવ્યા છે. યાદીમાં ગોવિંદને ડિસ્ચાર્જ કરાયા હોવાનું જણાવાયું છે, જ્યારે તેમની અન્ય વિગતોની જાણકારી એકત્રિત કરવામાં આવી રહી છે.

હિન્દુસ્થાન સમાચાર / રાજેશ કુમાર પાંડેય / મુકુંદ

હિન્દુસ્થાન સમાચાર / ડો.હિતેશ એન.વ્યાસ