- 43 મહિલાઓ અને બાળાઓને એચપીવી રસીનો પ્રથમ ડોઝ અપાયો.

ભાવનગર, 02 ઓગસ્ટ (હિ.સ.) : પશ્ચિમ રેલવેની ભાવનગર મંડળ રેલવે હોસ્પિટલમાં મહિલાઓ અને બાળાઓના આરોગ્ય સંરક્ષણ માટે એક મહત્વપૂર્ણ પહેલરૂપે હ્યુમન પેપિલોમાવાયરસ (HPV) રસીકરણ અભિયાનનું સફળ આયોજન કરવામાં આવ્યું. આ અભિયાન મંડળ રેલવે મેનેજર દિનેશ વર્માના માર્ગદર્શન હેઠળ તથા મંડળ રેલવે હોસ્પિટલના મુખ્ય તબીબી અધિક્ષક ડૉ. મનોજ કુમારની દેખરેખમાં યોજાયું.

આ અભિયાનનો મુખ્ય હેતુ બાળાઓ અને મહિલાઓમાં સર્વાઇકલ કેન્સર જેવી ગંભીર બીમારી સામે રક્ષણ અંગે જાગૃતિ ફેલાવવાનો તથા સમયસર એચપીવી રસીકરણ સુનિશ્ચિત કરવાનો હતો. અભિયાન દરમિયાન કુલ 43 મહિલાઓ અને બાળાઓને એચપીવી રસીનો પ્રથમ ડોઝ સફળતાપૂર્વક આપવામાં આવ્યો.

રસીકરણ પહેલાં તમામ લાભાર્થીઓનું નોંધણી કાર્ય તથા આરોગ્ય પરીક્ષણ કરવામાં આવ્યું. ઉપરાંત, તેમને એચપીવી ચેપ, સર્વાઇકલ કેન્સરની રોકથામ અને રસીકરણના મહત્વ વિશે વિગતવાર માહિતી આપી જાગૃત કરવામાં આવ્યા. તબીબો અને આરોગ્ય કર્મચારીઓએ લાભાર્થીઓની જિજ્ઞાસાઓનું નિરાકરણ કર્યું તેમજ તેમને નિર્ધારિત સમયસર આગામી ડોઝ લેવા માટે પણ પ્રેરિત કર્યા.

આ અભિયાનનું સંચાલન મંડળ રેલવે હોસ્પિટલના મુખ્ય નર્સિંગ અધિક્ષક શ્રી અમૃત મરેઠાના નેતૃત્વમાં સુવ્યવસ્થિત અને સુરક્ષિત રીતે કરવામાં આવ્યું. આ પ્રસંગે મુખ્ય તબીબી અધિક્ષક ડૉ. મનોજ કુમારે જણાવ્યું કે મહિલાઓના આરોગ્યની સુરક્ષા અને રોગોની રોકથામ માટે નિવારક આરોગ્ય સેવાઓને પ્રોત્સાહન આપવું આજના સમયની આવશ્યકતા છે અને એચપીવી રસીકરણ સર્વાઇકલ કેન્સરની રોકથામ માટે અત્યંત અસરકારક પગલું છે.

લાભાર્થીઓ અને તેમના પરિવારજનોએ આ પહેલની પ્રશંસા કરતાં પશ્ચિમ રેલવેના આ જનહિતકારી પ્રયાસને મહિલાઓના આરોગ્ય સંરક્ષણ માટેનું સરાહનીય અને ઉપયોગી પગલું ગણાવ્યું.

ભાવનગર મંડળ રેલવે હોસ્પિટલ ભવિષ્યમાં પણ આવા આરોગ્ય જાગૃતિ અને નિવારક આરોગ્ય કાર્યક્રમોનું નિયમિત આયોજન કરતી રહેશે, જેથી રેલવે કર્મચારીઓ, તેમના પરિવારજનો તથા અન્ય પાત્ર લાભાર્થીઓને ગુણવત્તાસભર અને સર્વાંગી આરોગ્ય સેવાઓ ઉપલબ્ધ કરાવી શકાય.

---------------

હિન્દુસ્થાન સમાચાર / ભરતસિંહ જાદવ