એમ્સ્ટલવીન, નવી દિલ્હી, 24 ઓગસ્ટ (હિ.સ.). ભારતીય મહિલા હોકી ટીમની એફઆઈએચ હોકી વિશ્વ કપ 2026ના સેમિફાઇનલમાં પહોંચવાની આશાઓ રવિવારે મોડી રાત્રે સમાપ્ત થઈ ગઈ. નિર્ણાયક પૂલ-ઈ મુકાબલામાં ભારતને ઓસ્ટ્રેલિયા સામે ગોલરહિત ડ્રોથી સંતોષ માનવો પડ્યો. આ પરિણામ સાથે ઓસ્ટ્રેલિયાએ સેમિફાઇનલમાં સ્થાન બનાવી લીધું, જ્યારે ભારત હવે પાંચમા-છઠ્ઠા સ્થાન માટે રમશે.

ભારતને અંતિમ ચારમાં પહોંચવા માટે કોઈપણ ભોગે જીત નોંધાવવી જરૂરી હતી. આ પહેલા દિવસે નેધરલેન્ડ્સે ચીનને હરાવ્યું હતું, જેના પછી ઓસ્ટ્રેલિયા માટે માત્ર ડ્રો જ સેમિફાઇનલમાં પહોંચવા માટે પૂરતો હતો. ઓસ્ટ્રેલિયાએ વધુ ગોલ કરવાના આધારે અંતિમ ચારમાં સ્થાન મેળવ્યું.

ભારત અને ચીનના બે-બે અંક રહ્યા, પરંતુ સારા ગોલ તફાવતને કારણે ભારત ત્રીજા સ્થાને રહ્યું. ભારતનો ગોલ તફાવત માઇનસ બે અને ચીનનો માઇનસ ત્રણ રહ્યો. આ પૂલમાંથી વર્તમાન ચેમ્પિયન નેધરલેન્ડ્સ અને ઓસ્ટ્રેલિયાએ સેમિફાઇનલમાં પ્રવેશ કર્યો.

ઓસ્ટ્રેલિયાએ શરૂઆતથી જ દબાણ બનાવ્યું

ઓસ્ટ્રેલિયાએ શરૂઆતથી જ બોલ પર કબજો જાળવી રાખ્યો અને ભારત પર દબાણ કર્યું. બીજી મિનિટે ઓસ્ટ્રેલિયાએ ગોલ કરી દીધો હતો, પરંતુ ભારતે તરત જ વીડિયો રેફરલ લીધો. રીપ્લેમાં બોલ ઓસ્ટ્રેલિયન ખેલાડીની સ્ટિકથી ભારતીય ડિફેન્ડરના શરીર પર લાગ્યો હોવાની પુષ્ટિ થયા બાદ ગોલ રદ કરવામાં આવ્યો.

ભારતને શરૂઆતના તબક્કામાં કેટલીક તકો મળી, પરંતુ ટીમ તેમને ગોલમાં ફેરવી શકી નહીં. 10મી મિનિટે ગોલકીપર સવિતા પુનિયાએ એમી લોટનના પ્રયાસને શાનદાર રીતે રોકીને ભારતને બચાવ્યું.

બીજા ક્વાર્ટરની શરૂઆતમાં સવિતાની જગ્યાએ બિચુ દેવીએ ગોલકીપિંગની જવાબદારી સંભાળી. તેમણે 19મી મિનિટે ગ્રેસ યંગના પ્રયાસને ડાઇવ લગાવીને રોકતા શાનદાર બચાવ કર્યો.

ભારતને 30મી મિનિટે પહેલો પેનલ્ટી કોર્નર મળ્યો, પરંતુ ઓસ્ટ્રેલિયન ડિફેન્સે તેને સફળતાપૂર્વક રોકી દીધો. પહેલા હાફ પછી બંને ટીમો 0-0થી બરાબરી પર હતી.

બીજા હાફમાં પણ નિર્ણાયક ગોલ ન આવ્યો

ભારતે બીજા હાફમાં આક્રમક વલણ અપનાવ્યું અને વધુ ખેલાડીઓને આગળ મોકલ્યા, પરંતુ ફોરવર્ડ ખેલાડીઓ વચ્ચે તાલમેલ અને અંતિમ પાસમાં તે ધાર ન દેખાઈ જેની ટીમને જરૂર હતી.

40મી મિનિટે ઓસ્ટ્રેલિયાએ પેનલ્ટી કોર્નર દ્વારા ગોલ કર્યો, પરંતુ વીડિયો રેફરલ પછી તેને પણ રદ કરવામાં આવ્યો. આ મેચમાં ઓસ્ટ્રેલિયાનો બીજો રદ થયેલો ગોલ હતો.

ભારતે જવાબમાં ઘણા હુમલા કર્યા. શિલ્પીએ 45મી મિનિટે જોરદાર શોટ માર્યો, પરંતુ બોલ ગોલની સામેથી નીકળી ગયો.

ગોલકીપર હટાવીને પણ સફળતા ન મળી

છેલ્લા ક્વાર્ટરમાં ભારતે ગોલની શોધ તેજ કરી દીધી. ઓસ્ટ્રેલિયાને ઘણા પેનલ્ટી કોર્નર મળ્યા, પરંતુ ભારતીય ડિફેન્સ અને બિચુ દેવીએ શાનદાર બચાવ કર્યો. 54મી મિનિટે બિચુએ પગથી શાનદાર બચાવ કરીને ઓસ્ટ્રેલિયાને લીડ લેતા રોક્યું.

મેચમાં પાંચ મિનિટથી વધુ સમય બાકી રહેતા ભારતે ગોલકીપરને હટાવીને વધારાનો આઉટફિલ્ડ ખેલાડી ઉતાર્યો અને નિર્ણાયક ગોલ કરવાનો પ્રયાસ કર્યો. ઓસ્ટ્રેલિયાને 59મી મિનિટે પેનલ્ટી કોર્નર મળ્યો, પરંતુ સલિમા ટેટેએ શાનદાર બચાવ કરતા ભારતને ગોલ થતો બચાવ્યો.

અંતે મુકાબલો 0-0થી બરાબરી પર સમાપ્ત થયો અને આ સાથે જ ભારતીય ટીમનું સેમિફાઇનલમાં પહોંચવાનું સપનું તૂટી ગયું. હવે ભારતીય મહિલા ટીમ પાંચમા-છઠ્ઠા સ્થાનના મુકાબલામાં ઉતરશે.

હિન્દુસ્થાન સમાચાર / સુનીલ દુબે

હિન્દુસ્થાન સમાચાર / માધવી વ્યાસ