લુસાને, નવી દિલ્હી, 22 ઓગસ્ટ (હિ.સ.). ભારતના સ્ટાર ભાલા ફેંક ખેલાડી નીરજ ચોપરાએ, શુક્રવારે લુસાને ડાયમંડ લીગમાં સિઝનનું પોતાનું સર્વશ્રેષ્ઠ પ્રદર્શન કરતા 88.05 મીટરનો થ્રો કર્યો, પરંતુ તેઓ ખિતાબ જીતવાથી માત્ર નવ સેન્ટિમીટરથી ચૂકી ગયા. શ્રીલંકાના રુમેશ પથિરાગેએ 88.14 મીટરના થ્રો સાથે પ્રથમ સ્થાન મેળવ્યું.

ગ્રેનાડાના એન્ડરસન પીટર્સ 86.69 મીટરના સર્વશ્રેષ્ઠ થ્રો સાથે ત્રીજા સ્થાને રહ્યા.

2026 કોમનવેલ્થ ગેમ્સમાં રજત પદક જીતીને આવેલા નીરજે પ્રથમ પ્રયાસમાં 83.54 મીટરનો થ્રો કર્યો. ત્યારબાદ બીજા પ્રયાસમાં તેમણે 88.05 મીટરનું અંતર કાપીને સિઝનનું સર્વશ્રેષ્ઠ પ્રદર્શન કર્યું. બીજા રાઉન્ડ પછી નીરજ ટોચ પર ચાલી રહ્યા હતા.

નીરજનો આ ગયા વર્ષે જૂનમાં પેરિસ ડાયમંડ લીગ પછી 88 મીટરથી વધુનો પ્રથમ થ્રો પણ રહ્યો. જોકે, કોમનવેલ્થ ગેમ્સના સુવર્ણ પદક વિજેતા પથિરાગેએ ત્રીજા પ્રયાસમાં 88.14 મીટરનો થ્રો કરીને નીરજને પાછળ છોડી દીધા.

બંને ખેલાડીઓના પ્રદર્શનમાં માત્ર નવ સેન્ટિમીટરનો તફાવત રહ્યો, પરંતુ આ તફાવત પથિરાગે માટે ખિતાબ જીતવા માટે પૂરતો સાબિત થયો. આ આ વર્ષે ડાયમંડ લીગમાં પથિરાગેની ત્રીજી જીત છે. આ પહેલા તેમણે રોમ અને દોહામાં પણ ખિતાબ જીત્યો હતો.

આ પરિણામ સાથે પથિરાગે સામે નીરજનો હેડ-ટુ-હેડ રેકોર્ડ 0-3 થઈ ગયો છે. હવે નીરજની નજર આગામી એશિયન ગેમ્સ પર રહેશે, જ્યાં તેઓ સિઝનનો પોતાનો પ્રથમ ખિતાબ જીતીને વાપસી કરવા ઈચ્છશે.

હિન્દુસ્થાન સમાચાર / સુનીલ દુબે

હિન્દુસ્થાન સમાચાર / ડો.હિતેશ એન.વ્યાસ