વડોદરા , 03 ઓગસ્ટ (હિ.સ.)

વડોદરા: શહેરમાં ચાલુ વરસાદી મોસમ વચ્ચે રોડ-રસ્તાઓની બિસ્માર હાલત ફરી એકવાર ચર્ચાનો વિષય બની છે. એક જ વરસાદી સીઝનમાં શહેરના અનેક મુખ્ય માર્ગો પર વિશાળ ખાડાઓ પડી જતાં વાહનચાલકોને ભારે હાલાકીનો સામનો કરવો પડી રહ્યો છે. અનેક સ્થળોએ રસ્તા પરથી પસાર થવું જોખમી બની ગયું છે, જેના કારણે અકસ્માતનો ભય પણ વધી રહ્યો છે.

શહેરના પ્રતાપનગર ઝેનિથ સ્કૂલથી યમુના મિલ સુધીનો અંદાજે બે કિલોમીટર લાંબો મુખ્ય માર્ગ હાલ અત્યંત ખરાબ હાલતમાં જોવા મળી રહ્યો છે. સમગ્ર માર્ગ પર અસંખ્ય ખાડાઓ પડી જતાં વાહનચાલકો માટે રસ્તો ઓળખવો પણ મુશ્કેલ બની ગયો છે. ખાસ કરીને બે-ચક્રી વાહનચાલકોને રોજિંદા અવરજવરમાં ભારે મુશ્કેલીનો સામનો કરવો પડી રહ્યો છે.

સ્થાનિકોના જણાવ્યા મુજબ, થોડા સમય પહેલાં જ આ માર્ગને પહોળો કરવાની કામગીરી પૂર્ણ કરવામાં આવી હતી. પરંતુ પ્રથમ જ વરસાદમાં રસ્તો ધોવાઈ જતાં કામની ગુણવત્તા સામે ગંભીર પ્રશ્નો ઊભા થયા છે. નવા બનેલા માર્ગની આવી સ્થિતિને લઈને લોકોમાં અસંતોષ જોવા મળી રહ્યો છે.

સ્થાનિક રહેવાસીઓ અને વાહનચાલકોનો આક્ષેપ છે કે રોડના નિર્માણ દરમિયાન ગુણવત્તા જાળવવામાં આવી ન હોવાથી રસ્તાઓ વરસાદનો સામનો કરી શક્યા નથી. મહાનગરપાલિકાના કમિશનર દ્વારા ગુણવત્તાયુક્ત કામગીરી માટે વારંવાર સૂચનાઓ આપવામાં આવી હોવા છતાં કેટલાક કોન્ટ્રાક્ટરો દ્વારા તેનો યોગ્ય અમલ થતો ન હોવાનું પણ સ્થાનિકોનું કહેવું છે.

આ મુદ્દે એક સામાજિક કાર્યકરે જણાવ્યું હતું કે પ્રજાના ટેક્સના નાણાંથી બનેલા રસ્તાઓ થોડા જ વરસાદમાં તૂટી જવું ખૂબ જ ગંભીર બાબત છે. જો સમયસર ખાડાઓનું સમારકામ કરવામાં નહીં આવે તો અકસ્માતોની સંખ્યા વધી શકે છે અને સામાન્ય નાગરિકોને વધુ મુશ્કેલીઓનો સામનો કરવો પડશે.

શહેરવાસીઓએ મહાનગરપાલિકા પાસે નુકસાનગ્રસ્ત માર્ગોનું તાત્કાલિક સમારકામ કરવા, કામગીરીની ગુણવત્તાની તપાસ કરવા અને બેદરકારી સાબિત થાય તો જવાબદાર અધિકારીઓ તથા કોન્ટ્રાક્ટરો સામે કડક કાર્યવાહી કરવાની માંગ ઉઠાવી છે.

---------------

હિન્દુસ્થાન સમાચાર / અમિત શાહ