ગૌહાટી, નવી દિલ્હી, 31 ઓગસ્ટ (હિ.સ.). આસામના સોનાપુરમાં રાષ્ટ્રીય ધોરીમાર્ગ 27 પર થયેલા ભયાનક માર્ગ અકસ્માતમાં મૃત્યુઆંક વધીને સાત થયો છે. રવિવારે રાત્રે એક ટ્રાવેલ બસ અને માલવાહક ટ્રક વચ્ચે થયેલી સામસામે ટક્કરમાં પાંચ લોકોના ઘટનાસ્થળે જ મોત થયા હતા, જ્યારે બે અન્ય લોકોના સારવાર દરમિયાન મોત થયા હતા.

તાજેતરની માહિતી અનુસાર, સાત મૃતદેહોમાંથી ત્રણને ગૌહાટી મેડિકલ કોલેજ અને હોસ્પિટલ (જીએમસીએચ) ખાતે રાખવામાં આવ્યા છે. ત્રણ મૃતદેહો સોનાપુર હોસ્પિટલમાં અને એક કોસ્મો હોસ્પિટલમાં છે.

પોલીસના જણાવ્યા અનુસાર, આ અકસ્માત ખેત્રી પોલીસ સ્ટેશનના અધિકારક્ષેત્ર હેઠળ માયાહાંગ અને ભૂરાગાંવ વચ્ચે ટેટેલિયા નજીક થયો હતો. ગૌહાટી તરફ જતી ટ્રાવેલ બસ (એએસ-01એચસી-0716) ડિવાઇડર ઓળંગી ગઈ અને વિરુદ્ધ દિશામાંથી આવી રહેલી માલવાહક ટ્રક (એએસ-07બીસી-4271) સાથે અથડાઈ. ટક્કર એટલી ગંભીર હતી કે બસ અને ટ્રક સંપૂર્ણપણે નાશ પામ્યા હતા.

અકસ્માત બાદ ઘટનાસ્થળે અફડાતફડી મચી ગઈ હતી. પોલીસ અને રહેવાસીઓએ બચાવ કામગીરી શરૂ કરી હતી, ક્ષતિગ્રસ્ત વાહનોમાં ફસાયેલા લોકોને બહાર કાઢ્યા હતા અને ઘાયલોને તાત્કાલિક હોસ્પિટલમાં ખસેડ્યા હતા.

અહેવાલો અનુસાર, નાગાંવથી ગૌહાટી જતી ટ્રાવેલર બસનું ટાયર રસ્તા પર ખાડામાં અથડાયા બાદ ફાટ્યું હતું. ત્યારબાદ બસ નિયંત્રણ બહાર નીકળી ગઈ, ડિવાઇડર ઓળંગી ગઈ અને સામેથી આવી રહેલા ટ્રક સાથે અથડાઈ.

પોલીસે તમામ મૃતદેહોને પોસ્ટમોર્ટમ માટે મોકલી દીધા છે. એફઆઈઆર નોંધવામાં આવી છે અને અકસ્માતનું કારણ તપાસવામાં આવી રહ્યું છે.

હિન્દુસ્થાન સમાચાર / શ્રીપ્રકાશ / અમરેશ દ્વિવેદી

હિન્દુસ્થાન સમાચાર / માધવી વ્યાસ