કચ્છ, 04 ઓગસ્ટ (હિ.સ.) પૂર્વ કચ્છના ગાંધીધામ વિસ્તારની આદિપુર પોલીસે મિલ્કત સંબંધિત ગુનાઓ સામે વધુ એક નોંધપાત્ર સફળતા હાંસલ કરી છે. અનડીટેક્ટેડ રહેલા મોટરસાયકલ ચોરીના ગુનાનો ભેદ ઉકેલી પોલીસે બે આરોપીઓને ઝડપી પાડ્યા છે અને તેમની પાસેથી ચોરીમાં ગયેલું ટુ-વ્હીલર પણ કબજે કરી કાયદેસરની કાર્યવાહી હાથ ધરી છે. આ કામગીરીથી વાહનચોરીના બનાવોમાં સંડોવાયેલા તત્વો સામે પોલીસની સતર્કતા વધુ એક વખત સામે આવી છે.

આદિપુર પોલીસ ટીમ સતત પેટ્રોલિંગ અને ગુપ્ત બાતમીના આધારે કાર્યવાહી કરી રહી હતી.આ દરમિયાન પોલીસને મળેલી ચોક્કસ માહિતીના આધારે કાર્યવાહી હાથ ધરવામાં આવી હતી. તપાસ દરમિયાન બે શંકાસ્પદ યુવકોને ઝડપી લેવામાં આવ્યા અને તેમની પૂછપરછમાં મોટરસાયકલ ચોરીના ગુનાનો ભેદ ખુલ્યો હતો. પોલીસે તેમની પાસેથી અંદાજે રૂ.30 હજાર કિંમતનું ચોરાયેલ મોટરસાયકલ કબજે કર્યું હતું.

પકડાયેલા આરોપીઓમાં કિડાણા ગામના ગાયત્રી સોસાયટી વિસ્તારમાં રહેતો 20 વર્ષીય ઇમ્તિયાઝ ઉર્ફે ઇતુડો હનિફ ચાવડા તેમજ કિડાણાની જ એકતા નગર સોસાયટીમાં રહેતો 18 વર્ષીય શેરમામદ ઉર્ફે શેરખાન ખેરમામદ સંધીનો સમાવેશ થાય છે. બંને સામે ભારતીય ન્યાય સંહિતાની કલમ 303(2) હેઠળ નોંધાયેલા ગુનામાં કાયદેસરની કાર્યવાહી કરવામાં આવી છે.

આ સમગ્ર ઓપરેશનમાં પોલીસ ઇન્સ્પેક્ટર એમ.સી. વાળા, પોલીસ સબ ઇન્સ્પેક્ટર આર.એમ. ડુવા તેમજ આદિપુર પોલીસ સ્ટેશનની સર્વેલન્સ ટીમે મહત્વની ભૂમિકા ભજવી હતી. ઝડપી તપાસ, ગુપ્ત બાતમી અને સંકલિત કાર્યવાહીના પરિણામે અનડીટેક્ટેડ રહેલો ગુનો ઉકેલી પોલીસે ચોરીનો મુદ્દામાલ પણ પરત મેળવ્યો છે. આ સફળ કામગીરીથી વિસ્તારમાં વાહનચોરી જેવા ગુનાઓ પર નિયંત્રણ લાવવા માટે પોલીસ વધુ સક્રિય બન્યાનો સ્પષ્ટ સંદેશ ગુનેગારો સુધી પહોંચ્યો છે.

હિન્દુસ્થાન સમાચાર / Rohit Ramjibhai Padhiyar