કચ્છ, 05 ઓગસ્ટ (હિ.સ.) : પૂર્વ કચ્છ ગાંધીધામ જિલ્લા પોલીસ માટે ગૌરવની ક્ષણ સર્જાઈ હતી, જ્યારે વિવિધ કક્ષાના કુલ 26 પોલીસ કર્મચારીઓને તેમની ફરજ પ્રત્યેની નિષ્ઠા, કામગીરી અને સેવા અવધિના આધારે ઉચ્ચ હોદ્દા પર બઢતી આપવામાં આવી હતી. પ્રમોશન મેળવનારા કર્મચારીઓ માટે યોજાયેલી પાઇપિંગ સેરેમનીમાં અધિકારીઓએ તેમને નવી જવાબદારીઓ માટે શુભેચ્છા પાઠવી અને વધુ સમર્પણ સાથે જનસેવામાં જોડાવા અનુરોધ કર્યો હતો.

ગુજરાત રાજ્યના પોલીસ મહાનિદેશક અને મુખ્ય પોલીસ અધિકારી દ્વારા રાજ્યભરમાં લાયકાત ધરાવતા પોલીસ કર્મચારીઓને સમયસર પ્રમોશન આપવાની પ્રક્રિયા હાથ ધરવા માટે સૂચનાઓ આપવામાં આવી હતી. આ સૂચનાઓના અનુસંધાને સરહદી રેન્જ ભુજના પોલીસ મહાનિરીક્ષક ચીરાગ કોરડીયાના માર્ગદર્શન હેઠળ પૂર્વ કચ્છ ગાંધીધામના પોલીસ અધિક્ષક સાગર બાગમારના નેતૃત્વમાં આ પ્રમોશન પ્રક્રિયા પૂર્ણ કરવામાં આવી હતી.

આ બઢતીમાં પોલીસ કોન્સ્ટેબલમાંથી પોલીસ હેડ કોન્સ્ટેબલ તરીકે કુલ 15 કર્મચારીઓને તેમજ પોલીસ હેડ કોન્સ્ટેબલમાંથી આસિસ્ટન્ટ સબ ઇન્સ્પેક્ટર (એએસઆઈ) તરીકે 11 કર્મચારીઓને ઉચ્ચ હોદ્દા પર સ્થાન આપવામાં આવ્યું હતું. આ રીતે કુલ 26 પોલીસ જવાનોને તેમની કારકિર્દીમાં મહત્વપૂર્ણ પ્રગતિનો અવસર મળ્યો હતો.

પ્રમોશન પ્રસંગે યોજાયેલા પાઇપિંગ સમારોહમાં જિલ્લા પોલીસ અધિક્ષક સાગર બાગમાર ઉપરાંત ડીવાયએસપી ડી.આર. ભાટીયા અને મુખ્ય મથકના ડીવાયએસપી એ.વી. રાજગોર સહિત અન્ય અધિકારીઓ ઉપસ્થિત રહ્યા હતા. અધિકારીઓએ પ્રમોશન મેળવનારા કર્મચારીઓને નવા હોદ્દાની નિશાનીરૂપે પાઇપ્સ પહેરાવી અભિનંદન પાઠવ્યા હતા.

આ પ્રસંગે અધિકારીઓએ જણાવ્યું હતું કે પોલીસ વિભાગમાં સમયસર મળતું પ્રમોશન કર્મચારીઓના મનોબળમાં વધારો કરે છે અને તેમને વધુ જવાબદારીપૂર્વક કામગીરી કરવા પ્રેરણા આપે છે. નવી જવાબદારીઓ સાથે કાયદો અને વ્યવસ્થાને વધુ મજબૂત બનાવવા તેમજ નાગરિકોને અસરકારક અને સંવેદનશીલ પોલીસ સેવા પૂરી પાડવા માટે તમામ કર્મચારીઓ નિષ્ઠાપૂર્વક કાર્ય કરશે તેવી આશા વ્યક્ત કરવામાં આવી હતી. સમગ્ર કાર્યક્રમ ઉત્સાહપૂર્ણ વાતાવરણમાં સંપન્ન થયો હતો અને પ્રમોશન મેળવનારા તમામ કર્મચારીઓ માટે આ દિવસ તેમની કારકિર્દીનો યાદગાર પ્રસંગ બની રહ્યો હતો.

---------------

હિન્દુસ્થાન સમાચાર / Rohit Ramjibhai Padhiyar