પોરબંદર, 05 ઓગસ્ટ (હિ.સ.) પોરબંદરના બોખીરા વિસ્તારમાંથી ગુમ થયેલી એક મહિલા અને તેના બે બાળકોને ઉદ્યોગનગર પોલીસ સ્ટેશનની સર્વેલન્સ ટીમે સુરક્ષિત રીતે શોધી કાઢ્યા છે.

પોલીસની ટેકનિકલ તપાસ અને હ્યુમન સોર્સના આધારે આ કામગીરી સફળ બની હોવાનું પોલીસે જણાવ્યું છે. પોલીસ મુજબ, બોખીરા રિલાયન્સ પેટ્રોલ પંપ પાછળ આવેલી ઋદ્ધિ-સિદ્ધિ પાર્કમાં રહેતી કિંજલબેન સુરેશભાઈ સોલંકી તેમજ તેના બે સંતાનો વંશિકા અને ક્રિયાંશ 1 જુલાઈના રોજ ઘરેથી નીકળ્યા બાદ ગુમ થયા હતા.

આ અંગે ઉદ્યોગનગર પોલીસ સ્ટેશનમાં ગુમ નોંધ દાખલ કરવામાં આવી હતી. તપાસ દરમિયાન હેડ કોન્સ્ટેબલ વિશાલભાઈ અને ભરતભાઈએ સંયુક્ત કામગીરી કરી મહિલા તથા બંને બાળકોને શોધી કાઢ્યાં. આ સમગ્ર કામગીરી પોલીસ અધિકારીઓના માર્ગદર્શન હેઠળ PI એમ.ડી. વાળા, ASI ભાવીન પ્રવીણભાઈ, HC દેવેન્દ્રસિંહ ધીરુભા, વિજયસિંહ ભોજુભા તેમજ PC વિજય જેન્તીલાલ, કનકસિંહ પરાક્રમસિંહ અને ભૌતિક હરિભાઈએ કરી હતી.

હિન્દુસ્થાન સમાચાર / Tejas Pravinbhai Dholariya