અમરેલી,07 ઓગસ્ટ (હિ.સ.)

અમરેલી શહેરમાં ખાદ્ય સુરક્ષા અને ગ્રાહકોના આરોગ્યને ધ્યાનમાં રાખીને ફૂડ એન્ડ ડ્રગ્સ વિભાગ દ્વારા પનીરના વેચાણ અને ગુણવત્તાની તપાસ માટે વિવિધ દુકાનોમાં સઘન ચકાસણી હાથ ધરવામાં આવી હતી. વિભાગની ટીમે શહેરની ડેરીઓ, મીઠાઈની દુકાનો, હોટલો તેમજ પનીર વેચતી અન્ય વેપારી સંસ્થાઓમાં પહોંચી તપાસ કરી હતી.

દરોડા દરમિયાન અધિકારીઓએ પનીરના નમૂનાઓ એકત્ર કરીને લેબોરેટરીમાં તપાસ માટે મોકલવાની કાર્યવાહી હાથ ધરી હતી. સાથે જ વેપારીઓને સ્વચ્છતા જાળવવા, ગુણવત્તાયુક્ત ખાદ્ય પદાર્થોનું વેચાણ કરવા તેમજ ફૂડ સેફ્ટી એન્ડ સ્ટાન્ડર્ડ્સ એક્ટના નિયમોનું પાલન કરવા સૂચના આપવામાં આવી હતી.

ફૂડ એન્ડ ડ્રગ્સ વિભાગના અધિકારીઓએ જણાવ્યું હતું કે ભેળસેળયુક્ત અથવા નીચી ગુણવત્તાના ખાદ્ય પદાર્થો સામે વિભાગ સતત સતર્ક છે અને સમયાંતરે આવી તપાસ હાથ ધરવામાં આવે છે. લેબોરેટરીના અહેવાલમાં જો કોઈ નમૂનો નિયમો મુજબનો નહીં હોવાનું સામે આવશે તો સંબંધિત વેપારીઓ સામે કાયદેસરની કાર્યવાહી કરવામાં આવશે.

વિભાગે નાગરિકોને પણ અપીલ કરી છે કે ખાદ્ય ચીજવસ્તુઓ ખરીદતી વખતે ગુણવત્તા, પેકિંગ, ઉત્પાદન તારીખ અને સમાપ્તિ તારીખની ચકાસણી કરે તેમજ કોઈ શંકાસ્પદ ખાદ્ય પદાર્થ અંગે માહિતી હોય તો ફૂડ એન્ડ ડ્રગ્સ વિભાગને જાણ કરે. આવી કાર્યવાહીથી ગ્રાહકોને સુરક્ષિત અને ગુણવત્તાયુક્ત ખાદ્ય પદાર્થો ઉપલબ્ધ થાય તેવો વિભાગનો પ્રયાસ છે.

---------------

હિન્દુસ્થાન સમાચાર / Gondaliya Abhishek Nandrambhai