કચ્છ, 16 સપ્ટેમ્બર (હિ.સ.) : મુન્દ્રા શહેરમાં જૈન સમાજ દ્વારા ધાર્મિક આસ્થા અને તપસ્યાભાવને ઉજાગર કરતો વિશેષ પ્રસંગ યોજાયો હતો. રૂષભ અશોકભાઈ સંઘવીએ પૂર્ણ કરેલા અઠ્ઠાઈ તપની અનુમોદના સાથે તેમના પારણા મહોત્સવનું ભવ્ય આયોજન કરવામાં આવ્યું હતું. પૂજ્ય સાધુ-સાધ્વીજી ભગવંતોની પાવન નિશ્રામાં યોજાયેલા આ ધાર્મિક કાર્યક્રમમાં મોટી સંખ્યામાં જૈન શ્રાવક-શ્રાવિકાઓ ઉપસ્થિત રહ્યા હતા.

મહોત્સવની શરૂઆત સવારે શ્રી શીતલનાથ જિનાલયથી નીકળેલી શોભાયાત્રાથી થઈ હતી. ધાર્મિક ભાવના અને ભક્તિપૂર્ણ વાતાવરણ વચ્ચે નીકળેલી આ યાત્રામાં મુન્દ્રાના સકળ જૈન સંઘના શ્રાવક-શ્રાવિકાઓ જોડાયા હતા. સાધુ-સાધ્વીજી ભગવંતોની નિશ્રામાં જૈન સમાજના આગેવાનો, મહિલાઓ અને યુવાનો સહિત ભાવિકોએ ઉત્સાહપૂર્વક ભાગ લીધો હતો.

શોભાયાત્રા જિનાલયથી આગળ વધીને સંઘવી દામોદરસિંહ ચાપસી પરિવારના નિવાસસ્થાને પહોંચી હતી. પૂજ્ય મહારાજ સાહેબના આગમનથી પરિવારજનો તેમજ ઉપસ્થિત ભાવિકોમાં આનંદ અને ભક્તિનો માહોલ જોવા મળ્યો હતો. આ પ્રસંગે મહારાજ સાહેબે ઉપસ્થિત સંઘને માંગલિક સંભળાવી આશીર્વાદ પાઠવ્યા હતા.

ધાર્મિક પ્રવચન દરમિયાન અઠ્ઠાઈ તપ જેવી તપસ્યાના જૈન ધર્મમાં રહેલા આધ્યાત્મિક મહત્ત્વ પર પ્રકાશ પાડવામાં આવ્યો હતો. તપ, સંયમ અને આત્મશુદ્ધિ દ્વારા જીવનમાં ધાર્મિક જાગૃતિ કેળવવાના સંદેશ સાથે તપસ્વીની સાધનાની અનુમોદના કરવામાં આવી હતી.

રૂષભ સંઘવીની તપસ્યાને બિરદાવવા અને ધાર્મિક ભાવનાને વધુ પ્રબળ બનાવવા સંઘવી પરિવાર દ્વારા ધર્મ પ્રભાવનાનું આયોજન કરવામાં આવ્યું હતું. સાથે જ તપસ્વી પરિવાર તરફથી ત્રણેય ગચ્છના સમસ્ત જૈન સંઘ માટે સામૂહિક નવકારશીનું આયોજન કરાયું હતું. મોટી સંખ્યામાં શ્રાવક-શ્રાવિકાઓએ નવકારશીમાં ઉપસ્થિત રહી તપસ્વીની તપસ્યાની અનુમોદના કરી હતી.

આ સમગ્ર મહોત્સવ દરમિયાન મુન્દ્રામાં ભક્તિ, તપ અને આધ્યાત્મિકતાનો માહોલ છવાયો હતો. તપસ્વી રૂષભ સંઘવીના અઠ્ઠાઈ તપની પૂર્ણાહુતિ નિમિત્તે યોજાયેલો આ પ્રસંગ જૈન સમાજમાં ધાર્મિક ઉત્સાહનું વિશેષ કેન્દ્ર બન્યો હતો.

---------------

હિન્દુસ્થાન સમાચાર / Rohit Ramjibhai Padhiyar