નવી દિલ્હી, 27 સપ્ટેમ્બર (હિ.સ.). રેલવે દેશમાં હાઇડ્રોજન ટ્રેન પછી, હવે પરિવહનને વધુ સ્વચ્છ અને ઇંધણ કાર્યક્ષમ બનાવવા માટે આજે વધુ એક મહત્વપૂર્ણ પગલું ભરવા જઈ રહ્યું છે. દેશની પહેલી એલએનજી (પ્રવાહીકૃત કુદરતી ગેસ) આધારિત ટ્રેન આજે પાટા પર દોડવા લાગશે. કેન્દ્રીય ગૃહ અને સહકાર મંત્રી અમિત શાહ, ગુજરાતના સાબરમતીમાં તેને લીલી ઝંડી બતાવશે.

કેન્દ્રીય ગૃહમંત્રી શાહ, આ દરમિયાન સાબરમતીમાં 1,542 કરોડ રૂપિયાથી વધુની વિવિધ રેલ પરિયોજનાઓનું ઉદ્ઘાટન, શિલાન્યાસ અને લોકાર્પણ પણ કરશે. આમાં લગભગ 700 કરોડ રૂપિયાના ખર્ચે તૈયાર થયેલા ડબલ્યુએજી-12 એન્જિન જાળવણી શેડનું ઉદ્ઘાટન પણ સામેલ છે.

રેલવે અનુસાર, આ પ્રણાલી અપનાવવાથી ડીઝલના વપરાશમાં લગભગ 40 ટકા સુધીનો ઘટાડો થવાની અપેક્ષા છે. આનાથી ઇંધણ ખર્ચ ઘટવાની સાથે કાર્બન ડાયોક્સાઇડ, નાઇટ્રોજન ઓક્સાઇડ અને પાર્ટિક્યુલેટ મેટરના ઉત્સર્જનમાં પણ ઘટાડો થશે. સાબરમતી ઇન્ટિગ્રેટેડ કોચિંગ ડેપોની 1,400-1,400 હોર્સપાવર ક્ષમતાવાળી બે ડ્રાઇવિંગ પાવર કારને એલએનજી-ડીઝલ બેવડી ઇંધણ પ્રણાલીમાં બદલવામાં આવી છે. તેનો ઉપયોગ આઠ કોચવાળી ટ્રેનના સંચાલનમાં કરવામાં આવશે.

દરેક એન્જિનથી વાર્ષિક લગભગ 11.9 લાખ રૂપિયાની બચતનો અંદાજ છે. બે એન્જિનના સ્તરે આ બચત વાર્ષિક લગભગ 23.9 લાખ રૂપિયા થાય છે. આ પ્રણાલીને એવી રીતે ડિઝાઇન કરવામાં આવી છે કે, પરંપરાગત ડીઝલ એન્જિનની શક્તિ, વિશ્વસનીયતા અને સંચાલન ક્ષમતા જળવાઈ રહે.

એન્જિન એલએનજી અને ડીઝલ બંને પર ચાલી શકે છે અને જરૂરિયાત મુજબ બંને ઇંધણ વચ્ચે સ્વિચ કરી શકે છે. જો કોઈ જગ્યાએ એલએનજી ઉપલબ્ધ ન હોય, તો ટ્રેનને ડીઝલ પર ચલાવી શકાશે. આનાથી ઇંધણની ઉપલબ્ધતા સંબંધિત સમસ્યાને કારણે લાંબા અંતરના સંચાલનમાં અવરોધની શક્યતા ઓછી થશે.

હિન્દુસ્થાન સમાચાર / મુકુંદ

હિન્દુસ્થાન સમાચાર / માધવી વ્યાસ