ગાંધીનગર, 28 સપ્ટેમ્બર (હિ.સ.) : ગાંધીનગર જિલ્લા મેજિસ્ટ્રેટ રવિન્દ્ર ખતાલે દ્વારા એક અગત્યનું જાહેરનામું બહાર પાડવામાં આવ્યું છે. ગાંધીનગર જિલ્લો રાજ્યનું પાટનગર હોવાથી તથા સચિવાલય, વિધાનસભા સંકુલ, મહાત્મા મંદિર અને અન્ય મહત્વના સ્થળો આવેલ હોવાથી નાગરિકો અને સાર્વજનિક મિલકતોની સુરક્ષા સુનિશ્ચિત કરવા આ નિર્ણય લેવાયો છે.
જાહેરનામાની મુખ્ય વિગતો અનુસાર ગાંધીનગર જિલ્લા તથા મ્યુનિસિપલ કોર્પોરેશન વિસ્તારના તમામ હોટેલ્સ, પેટ્રોલપંપ, ટોલ પ્લાઝા, બેંક, એ.ટી.એમ., શોપિંગ મોલ/કોમ્પ્લેક્સ, બસ સ્ટેન્ડ, રેલવે સ્ટેશન, ધાર્મિક સ્થળો, મલ્ટીપ્લેક્સ થિયેટર, જ્વેલરી શોપ, ધર્મશાળા, ગેસ્ટહાઉસ વગેરે સ્થળોના માલિકો/કબ્જેદારો/ભાડુઆતોએ સી.સી.ટી.વી. કેમેરા સિસ્ટમ લગાવવાની રહેશે.
કેમેરાની ટેકનિકલ વિશિષ્ટતાઓ અંગે આ જાહેરનામામાં કરવામાં આવેલ સ્પષ્ટતા અનુસાર સી.સી.ટી.વી. કેમેરા હાઈ ડેફિનેશન અને નાઈટ વિઝન ક્ષમતા ધરાવતા હોવા જોઈએ, જેથી વાહનોના નંબર અને વ્યક્તિઓના ચહેરા સ્પષ્ટ જોઈ શકાય. તથા તમામ સી.સી.ટી.વી. સિસ્ટમનું ઓછામાં ઓછું ૧૫ દિવસનું રેકોર્ડિંગ જાળવી રાખવું ફરજિયાત છે.
આ જાહેરનામું તા. ૨૬/૦૯/૨૦૨૬ થી તા. ૨૪/૧૧/૨૦૨૬ સુધી બંને દિવસો સહિત અમલમાં રહેશે. આ જાહેરનામાનો ભંગ કરનાર વ્યક્તિ સામે કાનૂની કાર્યવાહી કરવામાં આવશે.
---------------
હિન્દુસ્થાન સમાચાર / અભિષેક બારડ
