મહેસાણા, 28 સપ્ટેમ્બર (હિ.સ.) મહેસાણા અને જોટાણા તાલુકાનો સંયુક્ત વન મહોત્સવ કાર્યક્રમ યોજાયો હતો. કાર્યક્રમમાં મહેસાણા ધારાસભ્ય મુકેશભાઈ પટેલ, તાલુકા પંચાયતના કારોબારી ચેરમેન, સંગઠનના હોદ્દેદારો તેમજ કડીના પ્રાંત અધિકારી સહિતના મહાનુભાવો ઉપસ્થિત રહ્યા હતા. કાર્યક્રમ દરમિયાન પર્યાવરણ જાળવણી અને હરિયાળી વધારવાના સંદેશ સાથે વૃક્ષારોપણ કરવામાં આવ્યું હતું.
વન મહોત્સવ અંતર્ગત ઉપસ્થિત મહાનુભાવોએ વૃક્ષોના મહત્વ અંગે માર્ગદર્શન આપ્યું હતું. પર્યાવરણનું સંતુલન જાળવવા માટે વધુમાં વધુ વૃક્ષોનું વાવેતર કરવાની સાથે વાવેલા વૃક્ષોનું નિયમિત જતન કરવું જરૂરી હોવાનું જણાવાયું હતું. વૃક્ષો માત્ર પર્યાવરણ માટે જ નહીં, પરંતુ આગામી પેઢી માટે સ્વચ્છ અને સ્વસ્થ વાતાવરણ ઊભું કરવા માટે પણ મહત્વપૂર્ણ છે.
કાર્યક્રમમાં ઉપસ્થિત આગેવાનો અને અધિકારીઓએ વૃક્ષારોપણ કરી વન સંરક્ષણ અને પર્યાવરણ પ્રત્યેની જવાબદારીનો સંદેશ આપ્યો હતો. સ્થાનિક સ્તરે હરિયાળી વધારવા તેમજ લોકોમાં વૃક્ષારોપણ અંગે જાગૃતિ આવે તે માટે આવા કાર્યક્રમોનું મહત્વ પણ વ્યક્ત કરવામાં આવ્યું હતું.
આ પ્રસંગે મહેસાણા અને જોટાણા તાલુકાના સ્થાનિક આગેવાનો, સંગઠનના હોદ્દેદારો, સંબંધિત વિભાગના અધિકારીઓ તથા અન્ય લોકો ઉપસ્થિત રહ્યા હતા. કાર્યક્રમ દરમિયાન ઉપસ્થિત સૌએ પર્યાવરણ સંરક્ષણમાં સહભાગી બનવાનો સંદેશ આપ્યો હતો. વન મહોત્સવને પગલે વિસ્તારમાં વૃક્ષારોપણ અને વૃક્ષોના જતન અંગે જાગૃતિ ફેલાવવાનો પ્રયાસ કરવામાં આવ્યો હતો.
---------------
હિન્દુસ્થાન સમાચાર / RINKU AMITKUMAR THAKOR
