નવી દિલ્હી, 29 સપ્ટેમ્બર (હિ.સ.) ગૃહ મંત્રાલયના વિદેશી વિભાગમાં તૈનાત એક વરિષ્ઠ એકાઉન્ટન્ટ અને અગાઉ ત્યાં કામ કરી ચૂકેલા એક એકાઉન્ટન્ટને બાકી એફસીઆરએ નોંધણી કરાવવાના બદલામાં કથિત રીતે લાંચ માંગવાના આરોપમાં પકડવામાં આવ્યા છે.

અધિકારીઓએ મંગળવારે માહિતી આપી કે, ગૃહ મંત્રાલયમાંથી મળેલી વિશેષ માહિતીના આધારે દિલ્હી પોલીસના વિશેષ સેલે કેન્દ્રીય એજન્સીઓ સાથે મળીને 28 સપ્ટેમ્બરના રોજ નવી દિલ્હીમાં, બંને સરકારી અધિકારીઓને પકડ્યા. બંનેએ કથિત રીતે એક એસોસિએશનનો સંપર્ક કર્યો હતો અને તેની બાકી વિદેશી યોગદાન (નિયમન) અધિનિયમ (એફસીઆરએ) નોંધણી કરાવવાના બદલામાં ગેરકાયદેસર રીતે લાંચની માંગણી કરી હતી.

અધિકારીઓ અનુસાર, ધરપકડ કરાયેલા અધિકારીઓમાંથી એક હાલમાં ગૃહ મંત્રાલયના વિદેશી વિભાગમાં વરિષ્ઠ એકાઉન્ટન્ટના પદ પર તૈનાત છે, જ્યારે બીજો હાલમાં પગાર અને હિસાબ કાર્યાલયમાં એકાઉન્ટન્ટ તરીકે કાર્યરત છે. તે આ પહેલાં વિદેશી વિભાગમાં કામ કરી ચૂક્યો છે. પ્રારંભિક પૂછપરછમાં સામે આવ્યું છે કે, બંને અધિકારીઓ કથિત રીતે ગેરકાયદેસર રીતે પૈસા લઈને કેટલાક સંગઠનોના એફસીઆરએ નોંધણી અને નવીકરણમાં મદદ કરવા માટે તેમના સંપર્કમાં હતા. આ મામલે વધુ તપાસ ચાલી રહી છે.

ગૃહ મંત્રાલયે એ પણ સ્પષ્ટ કર્યું કે, એફસીઆરએ સંબંધિત તમામ સેવાઓ એફસીઆરએ પોર્ટલ દ્વારા ઓનલાઈન ઉપલબ્ધ છે અને કોઈપણ એફસીઆરએ સેવામાં સહાયતા માટે કોઈ વચેટિયા, એજન્ટ કે વ્યક્તિને અધિકૃત કરવામાં આવ્યા નથી.

હિન્દુસ્થાન સમાચાર / સુશીલ કુમાર / સુનીત નિગમ

હિન્દુસ્થાન સમાચાર / માધવી વ્યાસ