ભાવનગર, 07 સપ્ટેમ્બર (હિ.સ.)બોટાદ શહેરની પીએમશ્રી એમ.એસ.બી. શાળા નં. ૨૪ ખાતે શિક્ષકદિનની અનોખી અને સર્જનાત્મક રીતે ઉજવણી કરવામાં આવી હતી. આ પ્રસંગે વિદ્યાર્થીઓએ એક દિવસ માટે **‘બાળ શિક્ષક’**ની ભૂમિકા ભજવી શિક્ષકોનું પ્રતિબિંબ બની વર્ગખંડમાં શૈક્ષણિક કાર્ય કરાવ્યું હતું.

શિક્ષકદિન નિમિત્તે વિદ્યાર્થીઓને શિક્ષકની જવાબદારી અને કાર્યપદ્ધતિનો પ્રત્યક્ષ અનુભવ થાય તે હેતુથી આ વિશેષ પ્રવૃત્તિનું આયોજન કરવામાં આવ્યું હતું. જેમાં પસંદગી પામેલા વિદ્યાર્થીઓએ શિક્ષકની જેમ વર્ગખંડમાં પ્રવેશ કરી અન્ય વિદ્યાર્થીઓને વિવિધ વિષયોનું અધ્યાપન કરાવ્યું હતું. બાળ શિક્ષકોએ બ્લેકબોર્ડ પર લખાણ, પ્રશ્નોત્તરી, ઉદાહરણો તેમજ વિવિધ શૈક્ષણિક પ્રવૃત્તિઓ દ્વારા પાઠ ભણાવ્યો હતો.

આ પ્રવૃત્તિ દરમિયાન વિદ્યાર્થીઓમાં આત્મવિશ્વાસ, નેતૃત્વ ક્ષમતા, સંવાદ કૌશલ્ય અને જવાબદારીની ભાવના વિકસે તેવો હેતુ રહ્યો હતો. બાળ શિક્ષક બનેલા વિદ્યાર્થીઓએ પણ શિક્ષક તરીકેની ભૂમિકા નિભાવવાનો આનંદ માણ્યો હતો. સાથે જ અન્ય વિદ્યાર્થીઓએ પોતાના સાથી વિદ્યાર્થી પાસેથી ભણવાનો નવો અનુભવ મેળવ્યો હતો.

શાળાના શિક્ષકોએ જણાવ્યું હતું કે, શિક્ષક બનવું માત્ર પાઠ ભણાવવાનું કાર્ય નથી, પરંતુ વિદ્યાર્થીઓને સમજવા, તેમની શૈક્ષણિક જરૂરિયાતો ઓળખવા અને યોગ્ય માર્ગદર્શન આપવાની જવાબદારી પણ છે. બાળ શિક્ષકની પ્રવૃત્તિથી વિદ્યાર્થીઓને શિક્ષકની મહેનત અને જવાબદારીનો અનુભવ થયો હતો.

આ રીતે પીએમશ્રી એમ.એસ.બી. શાળા નં. ૨૪ ખાતે શિક્ષકદિનની ઉજવણી માત્ર ઔપચારિક ન રહેતા ‘વિદ્યાર્થીમાંથી શિક્ષક’ બનાવતી પ્રેરણાદાયી પ્રવૃત્તિ બની રહી હતી.

---------------

હિન્દુસ્થાન સમાચાર / DISHANT NANDRAMBHAI GONADLIYA