નવી દિલ્હી, 16 ઓક્ટોબર (હિ.સ): યુવા બાબતો અને રમતગમત મંત્રી ડૉ. મનસુખ માંડવિયાએ 2030 શતાબ્દી કોમનવેલ્થ ગેમ્સ માટે પ્રસ્તાવિત યજમાન શહેર તરીકે અમદાવાદની ભલામણને ભારતીય રમતગમત માટે એક ઐતિહાસિક ક્ષણ ગણાવી. તેમણે કહ્યું કે, આ નિર્ણય ભારતના રમતગમત ઇતિહાસમાં એક મોટો સીમાચિહ્નરૂપ સાબિત થશે.

ડૉ. માંડવિયાએ સોશિયલ મીડિયા પર કહ્યું, 2030 શતાબ્દી કોમનવેલ્થ ગેમ્સ માટે પ્રસ્તાવિત યજમાન શહેર તરીકે અમદાવાદની ભલામણ કરવા બદલ હું કોમનવેલ્થ ગેમ્સ એક્ઝિક્યુટિવ બોર્ડનો આભારી છું. આ નિર્ણય વડા પ્રધાન નરેન્દ્ર મોદીના દૂરંદેશી નેતૃત્વ હેઠળ વૈશ્વિક રમતગમત શક્તિ તરીકે ભારતની વધતી જતી પ્રતિષ્ઠાને પ્રતિબિંબિત કરે છે.

તેમણે કહ્યું કે, આ વિકાસ 2036 ઓલિમ્પિક ગેમ્સનું આયોજન કરવાના ભારતના સ્વપ્નને પણ મજબૂત બનાવશે.

તેમણે કહ્યું, કેન્દ્ર સરકારના વિઝન સાથે સુસંગત આ એક મોટું પગલું છે. ભારતે તાજેતરમાં નવી દિલ્હીમાં વર્લ્ડ પેરા એથ્લેટિક્સ ચેમ્પિયનશિપનું સફળતાપૂર્વક આયોજન કરીને તેની સંગઠનાત્મક ક્ષમતાઓ સાબિત કરી છે. છેલ્લા દાયકામાં, વિશ્વ કક્ષાના રમતગમત માળખા, નીતિગત સુધારા, રમતગમત વિજ્ઞાન અને નાણાકીય સહાય દ્વારા, આપણે ઝડપથી 'ચેમ્પિયન્સનો રાષ્ટ્ર' બનવા તરફ આગળ વધી રહ્યા છીએ.

માંડવિયાએ કહ્યું કે, ભારતે હંમેશા કોમનવેલ્થ ગેમ્સમાં અસાધારણ રીતે સારું પ્રદર્શન કર્યું છે, અને આ ભલામણ ભારતના વધતા રમતગમત પ્રભાવનો પુરાવો છે.

નોંધનીય છે કે, કોમનવેલ્થ ગેમ્સ એક્ઝિક્યુટિવ બોર્ડે 2030 કોમનવેલ્થ ગેમ્સનું આયોજન કરવા માટે અમદાવાદને પ્રસ્તાવિત શહેર તરીકે ભલામણ કરી છે. આ ભલામણ હવે 26 નવેમ્બર, 2025 ના રોજ મંજૂરી માટે જનરલ એસેમ્બલી સમક્ષ મૂકવામાં આવશે.

2030 કોમનવેલ્થ ગેમ્સ કોમનવેલ્થ ગેમ્સના શતાબ્દી વર્ષમાં યોજાશે અને 74 સભ્ય દેશોમાં સહકાર, સમાવેશીતા અને રમતગમત શ્રેષ્ઠતાનું પ્રતીક બનશે. આ ઇવેન્ટ ભારતના વૈશ્વિક રમતગમત કેન્દ્ર બનવાના વિઝનને વધુ મજબૂત બનાવશે.

હિન્દુસ્થાન સમાચાર / સુનિલ દુબે

હિન્દુસ્થાન સમાચાર / માધવી વ્યાસ