નવી દિલ્હી, 18 ઓક્ટોબર (હિ.સ.). બિહાર વિધાનસભા ચૂંટણી અને અનેક રાજ્યોમાં પેટાચૂંટણીઓ માટે મતદાનના દિવસે કર્મચારીઓને સ-વેતન રજા આપવામાં આવશે. ચૂંટણી પંચે આ આદેશ જારી કર્યો છે જેથી દરેક મતદાતા મતદાનનો અધિકાર વાપરી શકે.

ચૂંટણી પંચે જણાવ્યું હતું કે લોક પ્રતિનિધિત્વ અધિનિયમ, 1951 ની કલમ 135-બી હેઠળ, કોઈપણ ખાનગી, વાણિજ્યિક, ઔદ્યોગિક અથવા અન્ય સંસ્થામાં કામ કરતા દરેક વ્યક્તિ જે મતદાન કરવા માટે લાયક છે, તેને ચૂંટણીના દિવસે સ-વેતન રજા આપવી આવશ્યક છે. આ દિવસે વેતનમાંથી કોઈ કપાત કરી શકાતી નથી. આ નિયમનું ઉલ્લંઘન કરનારા કોઈપણ નોકરીદાતાને દંડ થઈ શકે છે.

પંચે જણાવ્યું હતું કે, જેઓ તેમના વિસ્તારની બહાર કામ કરે છે, પરંતુ જ્યાં ચૂંટણીઓ યોજાઈ રહી છે તે વિધાનસભા મતવિસ્તારની મતદાર યાદીમાં છે, તેમને પણ મતદાનના દિવસે સ-વેતન રજા મળશે જેથી તેઓ મતદાન કરી શકે. આ સુવિધા કામચલાઉ અને દૈનિક વેતન ધરાવતા કર્મચારીઓને પણ આપવામાં આવશે.

ઉલ્લેખનીય છે કે, બિહારમાં મતદાનનો પ્રથમ તબક્કો 6 નવેમ્બર (ગુરુવાર) ના રોજ યોજાશે, જ્યારે સંબંધિત રાજ્યોમાં મતદાન અને પેટાચૂંટણીનો બીજો તબક્કો 11 નવેમ્બર (મંગળવાર) ના રોજ યોજાશે.

હિન્દુસ્થાન સમાચાર / પ્રશાંત શેખર / પવન કુમાર

હિન્દુસ્થાન સમાચાર / ડો.હિતેશ એન.વ્યાસ