વોશિંગ્ટન, નવી દિલ્હી, 22 ઓક્ટોબર (હિ.સ.). અમેરિકી પ્રમુખ ડોનાલ્ડ ટ્રમ્પ અને રશિયન પ્રમુખ વ્લાદિમીર પુતિન વચ્ચેની બીજી શિખર બેઠક હાલ માટે નહીં થાય. આ બેઠક બુડાપેસ્ટમાં યોજાવાની હતી. એક વહીવટી અધિકારીએ મંગળવારે જણાવ્યું હતું કે, નજીકના ભવિષ્યમાં બંને નેતાઓ વચ્ચે શિખર બેઠકની કોઈ યોજના નથી. ગુરુવારે ટ્રમ્પના એક ફોન કોલ બાદના નિવેદન બાદ આ ફેરફાર આવ્યો છે જેમાં તેમણે કહ્યું હતું કે, બંને બે અઠવાડિયામાં મળશે.

સીએનએનના અહેવાલ મુજબ ટ્રમ્પે મંગળવારે કહ્યું હતું કે, તેઓ ઇચ્છતા નથી કે આ બેઠક સમયનો બગાડ બને. જ્યારે તેમણે સંકેત આપ્યો હતો કે, તેઓ હજુ પણ રશિયન નેતા સાથે મળી શકે છે, ત્યારે તેમણે સંકેત આપ્યો હતો કે, તે હવે તેમની ટોચની પ્રાથમિકતા નથી. અમે તમને આગામી બે દિવસમાં જણાવીશું કે અમે શું કરી રહ્યા છીએ, રાષ્ટ્રપતિએ પત્રકારોને જણાવ્યું હતું.

ગયા ગુરુવારે ટ્રમ્પે કહ્યું હતું કે, અમેરિકા અને રશિયા સંમત થયા હતા કે અમારા ઉચ્ચ-સ્તરીય સલાહકારો આવતા અઠવાડિયે મળશે. આ પછી, અધિકારીઓએ આશા વ્યક્ત કરી હતી કે, વિદેશ સચિવ માર્કો રુબિયો તેમના રશિયન સમકક્ષ, સેરગેઈ લવરોવ સાથે મુલાકાત કરીને ટ્રમ્પ-પુતિન શિખર સંમેલન માટે પાયો નાખશે.

અધિકારીઓએ જણાવ્યું હતું કે, રાજદ્વારી સંપર્ક હવે થઈ રહ્યો નથી. એક સૂત્રએ જણાવ્યું હતું કે, યુક્રેન પર રશિયાના આક્રમણના સંભવિત અંત અંગે રુબિયો અને લવરોવની અપેક્ષાઓ અલગ અલગ હતી. રૂબિયો અને લવરોવએ સોમવારે ફોન પર વાત કરી હતી. એક વહીવટી અધિકારીએ મંગળવારે જણાવ્યું હતું કે, રુબિયો અને લવરોવ વચ્ચેની વાતચીત ફળદાયી રહી હતી. તેથી, બંને વચ્ચે રૂબરૂ મુલાકાત જરૂરી નથી. રાષ્ટ્રપતિ ટ્રમ્પનો નજીકના ભવિષ્યમાં પુતિન સાથે મુલાકાત કરવાનો કોઈ પ્લાન નથી.

હિન્દુસ્થાન સમાચાર / મુકુંદ

હિન્દુસ્થાન સમાચાર / માધવી વ્યાસ