નવી દિલ્હી, 16 નવેમ્બર (હિ.સ): ઉપરાષ્ટ્રપતિ સી.પી. રાધાકૃષ્ણન, રવિવારે નવી દિલ્હીમાં ઓડિટ દિવસ ઉજવણીમાં મુખ્ય અતિથિ તરીકે હાજરી આપી હતી. આ પ્રસંગે, ઉપરાષ્ટ્રપતિએ કોમ્પ્ટ્રોલર અને ઓડિટર જનરલ (સીએજી) ની મહત્વપૂર્ણ ભૂમિકાની પ્રશંસા કરી, સંસ્થાને 'જાહેર તિજોરીના રક્ષક' ગણાવી. તેમણે ભાર મૂક્યો કે ઓડિટમાં ઉદ્દેશ્ય અને અખંડિતતા જાળવી રાખીને, સીએજી જવાબદારી, પારદર્શિતા અને પ્રમાણિકતાના સ્તંભ તરીકે ઊભું છે - જે ભારતની નૈતિક સંપત્તિ છે.

રાધાકૃષ્ણને કેન્દ્ર સરકાર અને તમામ રાજ્ય સરકારો માટે 'એક રાષ્ટ્ર, એક ઉદ્દેશ્ય ખર્ચ શીર્ષ' ને સૂચિત કરવા બદલ સીએજી ની પણ પ્રશંસા કરી. આ એક એવો સુધારો છે જે સરકારી ખર્ચની પારદર્શિતા અને તુલનાત્મકતામાં નોંધપાત્ર વધારો કરશે. ઉપરાષ્ટ્રપતિએ કહ્યું કે, વિશ્વ આરોગ્ય સંગઠન (ડબ્લ્યુએચઓ), આંતરરાષ્ટ્રીય શ્રમ સંગઠન (આઈએલઓ) અને અન્ય ઘણી આંતરરાષ્ટ્રીય સંસ્થાઓ માટે બાહ્ય ઓડિટર તરીકેની ભૂમિકા દ્વારા સીએજી ની વૈશ્વિક પ્રતિષ્ઠામાં વધારો થયો છે.

તેમણે વધુમાં નોંધ્યું કે, સીએજી હાલમાં એસોસિએશન ઓફ એશિયન સુપ્રીમ ઓડિટ ઇન્સ્ટિટ્યુશન્સ (એએસઓએસએઆઈ) નું અધ્યક્ષપદ સંભાળે છે, જે ભારતની અનુયાયીથી વૈશ્વિક નેતા બનવાની સફરનો પુરાવો છે. 2047 સુધીમાં ભારત વિકસિત ભારતના વિઝન તરફ આગળ વધી રહ્યું છે, તેમ તેમણે ભાર મૂક્યો કે, સીએજી અસરકારક શાસન માટે નાણાકીય શિસ્ત અને પારદર્શિતા સુનિશ્ચિત કરવામાં મુખ્ય ભાગીદાર રહેશે. તેમણે અધિકારીઓને જાહેર ખર્ચમાં પારદર્શિતા વધારવા અને જાહેર ભંડોળનો ઉપયોગ જાહેર કલ્યાણ માટે થાય તે સુનિશ્ચિત કરવા માટે તેમની કુશળતા અને ઓડિટ ક્ષમતાઓને સતત અપગ્રેડ કરવા વિનંતી કરી.

હિન્દુસ્થાન સમાચાર / અનૂપ શર્મા / સુનિત નિગમ

હિન્દુસ્થાન સમાચાર / માધવી વ્યાસ