નવી દિલ્હી, 5 નવેમ્બર (હિ.સ.). દેશની સૌથી મોટી કાર ઉત્પાદક કંપની મારુતિ સુઝુકી ઇન્ડિયા લિમિટેડે તેનું 3 કરોડમું પેસેન્જર વાહન વેચ્યું છે. આ સિદ્ધિ સાથે, મારુતિ સુઝુકી સ્થાનિક બજારમાં આ સીમાચિહ્ન પાર કરનારી પ્રથમ ભારતીય કાર ઉત્પાદક બની છે.

બુધવારે એક નિવેદનમાં, કંપનીએ જણાવ્યું હતું કે, તેણે ફક્ત 42 વર્ષમાં આ સીમાચિહ્ન હાંસલ કર્યું છે. મારુતિ સુઝુકી ઇન્ડિયાએ 14 ડિસેમ્બર, 1983 ના રોજ ભારતમાં ગ્રાહકને તેની પ્રથમ કાર, મારુતિ 800 પહોંચાડી હતી. મારુતિએ કહ્યું હતું કે, તેણે 28 વર્ષ અને બે મહિનામાં પહેલી વાર 1 કરોડ નો સંચિત વેચાણનો આંકડો પાર કર્યો હતો. ત્યારબાદ 1 કરોડ કાર, સાત વર્ષ અને પાંચ મહિનામાં વેચાઈ હતી. ત્યારબાદ, છ વર્ષ અને ચાર મહિનાના રેકોર્ડ સમયમાં સ્થાનિક બજારમાં 1 કરોડ કાર વેચાઈ હતી.

મારુતિએ કહ્યું કે, ભારતમાં વેચાયેલી 3 કરોડ કારમાંથી, અલ્ટો સૌથી લોકપ્રિય મોડેલ તરીકે ઉભરી આવ્યું છે, જેમાં 47 લાખથી વધુ યુનિટ વેચાયા છે. આ પછી, વેગન આર 34 લાખ યુનિટ સાથે બીજા ક્રમે આવી, અને સ્વિફ્ટ 32 લાખ યુનિટથી વધુ યુનિટ સાથે ત્રીજા ક્રમે આવી. ઓટોમેકરે જણાવ્યું હતું કે, કોમ્પેક્ટ એસયુવી બ્રેઝા અને ફ્રોન્ક્સ પણ કંપનીના સેગમેન્ટમાં ટોચના દસ સૌથી વધુ વેચાતા વાહનોમાં સ્થાન ધરાવે છે.

મારુતિ સુઝુકી ઇન્ડિયાના મેનેજિંગ ડિરેક્ટર અને ચીફ એક્ઝિક્યુટિવ ઓફિસર (સીઈઓ) હિસાશી તાકેઉચીએ જણાવ્યું હતું કે, દર એક હજાર લોકો દીઠ આશરે 33 વાહનોની કાર ઉપલબ્ધતા સાથે, અમે જાણીએ છીએ કે અમારી સફર હજુ પૂરી થઈ નથી. તેમણે ઉમેર્યું હતું કે કંપની શક્ય તેટલા વધુ લોકોને પરિવહનનો આનંદ પહોંચાડવા માટે તમામ પ્રયાસો ચાલુ રાખશે. મારુતિ સુઝુકી ઇન્ડિયા હાલમાં 19 મોડેલમાં 170 થી વધુ વેરિયન્ટ્સ ઓફર કરે છે.

હિન્દુસ્થાન સમાચાર / પ્રજેશ શંકર / સુનિત નિગમ

હિન્દુસ્થાન સમાચાર / ડો.હિતેશ એન.વ્યાસ